Kontratat njëburimore përplasin Kurtin e Tahirin

Me replika dhe kundër-repika ka vazhduar seanca e sotme plenare për punën katër vjeçare të kryeministrit, Albin Kurti. Derisa shefi i grupit parlamentar të AAK-së, Besnik Tahiri kërkoi të di saktësisht nëse Kurti ka qenë në dijeni për kontratat njëburimore, ishte vetë kryeministri, Kurti i cili tha se qeverisja e tij nuk ka bërë gjëra të paligjshme.

Deputeti i AAK-së, Besnik Tahiri tha se nuk iu intereson të dinë se çka ka ngrënë e pirë e kujt i ka telefonuar kryeministri, Kurti.

Sipas tij kryeministri duhet të flas për kontratat njëburimore.

“Ju vetëm që nuk shkuat në send items të emailit tonë dhe me na tregu kujt i ke dërguar email, kujt i ke dërguar letër, sa telefonata i ke bërë, sa faksa i ke dërguar, çka ke ngrënë e çka ke pirë. O nuk është kah na intereson neve detyrën që e ke me Kushtetutë nuk na intereson neve çka ke në send items të emaileve. Dil tregona këtu a jeni në dijeni të kontratave një burimore, dil tregona këtu se cila është lidhja jote me Martinin me rezervat shtetërore, korrupsionin me Nagipin, me rrymën. Dil tregoju qytetarëve se çka ke bërë ti me uljen e kostos së jetesës, për me ul rrymën se ke premtuar që Kosova po flenë mbi qymyr dhe e ke ngritur çmimin e rrymës. Secili artikull ushqimor është rritur mezi po e lidhin njerëzit muajin me muaj dhe ti na tregon për sent items të emaileve tuaj”, tha ai.

Pas kësaj deklarate, kryeministri i Kosovës, Albin Kurti tha se qeverisja e tij nuk ka bërë gjëra të paligjshme. Sipas Kurtit ekziston mundësia ligjore për të pasur cilësinë më të lartë e kosto më të ulët nëpërmjet procedurës së negociuar të tenderimit.

“Qeveria jonë nuk ka bërë gjëra të paligjshme, ekziston mundësia ligjore për të pasur cilësinë më të lartë e kosto më të ulët nëpërmjet procedurës së negociuar të tenderimit. Nuk bëhet fjalë as për sekrete as për një burimore, por për formulimin e qartë ligjor që është procedurë e negociuar. Unë e kam të vështirë të diskutoj se me gjithë respektin deputeti Tahiri në fjalën tuaj hyrëse ju thatë se kryeministrit nuk i ka shkelur këmba në State Department e Shtëpi të Bardh, po sekretarin Blinken ku e kam takuar Jask Halaven e kam takuar në Shtëpi të Bardhë. Ndërsa, sekretarin, Blinken në State Department”, theksoi ai. /Kp/Telegrafi/