Konfirmohet: Arrestohet njëri nga të dyshuarit për sulmin ndaj autobusit të Borussias, tjetri në arrati – dyshohet për lidhje me “islamistët radikalë” (Foto/Video)

I dyshuari për sulmin në Dortmund është arrestuar dhe besohet të ketë lidhje me islamistët radikalë, kurse eksplozivin të cilin e kanë përdorur dy sulmuesit përmbante gjilpëra të metalta, raporton RT.

Policia gjermane dhe prokurori, kanë konfirmuar se dy të dyshuarit kanë lidhje me islamistët radikalë, dhe se hetimet janë duke vazhduar, transmeton Telegrafi.

Apartamentet e të dyshuarve janë bastisur, kurse njëri prej tyre është arrestuar derisa tjetri është në arrati.

Prokurori Frauke Keller, gjithashtu ka konfirmuar gjatë një konference për shtyp se shrapneli nga mjeti shpërthyes është përdorur gjatë sulmit duke fluturuar mbi 100 metra, dhe se përmbante gjilpëra të metalta të cilat ishin nguluar në karriget e autobusit, duke shkaktuar dëme të mëdha materiale.

Policia gjermane është duke hetuar lidhjet e mundshme “me islamistët radikal” në tre shpërthimet që ndodhën në afërsi të autobusit të ekipit të Borusia Dortmundit para ndeshjes së Ligës së Kampionëve, ku në vendin e ngjarjes kanë gjetur edhe një letër ku përmendet sulmi në sheshin e Krishtlindjeve në Berlin.

Në total janë gjetur tri letra në vendin e ngjarjes, dhe pikërisht këto letra i kanë bërë hetuesit të mendojnë se kryesit e kësaj vepre makabre mund të kenë lidhje me islamistët radikalë. Një nga këto letra fillonte me fjalën “Në emër të Allahut, mëshiruesit”.

Policia gjithashtu ka konfirmuar se në njërën nga letrat, bëhet thirrje që aeroplanët luftarak gjermanë “Tornado” të pezullojnë aktivitetet e tyre në hapësirën ajrore siriane, si dhe kërkohet mbyllja e bazës ajrore amerikane në Ramsttein të Gjermanisë. /Telegrafi/

Live aus Karlsruhe: #Presseerklärung der #Bundesanwaltschaft zur #Explosion in #Dortmund. #BVBASM #BKA #GBA https://t.co/hVFbIoCTV4

— Bundeskriminalamt (@bka) April 12, 2017