Edhe 37 raste me COVID-19 në Prishtinë, shkon mbi 400 numri i rasteve aktive

Instituti Kombëtar i Shëndetësisë Publike të Kosovës ka bërë të ditur se vetëm në komunën e Prishtinës në analizat e bëra sot për COVID-19, 37 persona kanë rezultuar pozitiv.

Gjithsej, sipas raportit të IKSHPK-së në territorin e Kosovës sonte janë konfirmuar 69 persona të infektuar me COVID-19, ku Prishtina është komuna me më së shumti të infektuar.

Sipas këtij raporti dhe të dhënave paraprake, tashmë numri i të infektuarve që janë aktiv në Prishtinë ka kaluar shifrën 400.

Lexo po ashtu Konfirmohen 69 raste të reja me coronavirus në Kosovë, 75 të shëruar

“Sot më 25 qershor 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 281 mostra të marra nga Klinika Infektive dhe gjurmimi i kontakteve të rasteve në terren. Me SARS-CoV-2, janë konfirmuar 69 raste. Rastet pozitive janë nga: komuna e Prishtinës 37 raste, komuna e Istogut 8 raste, komuna e Prizrenit 5 raste, komuna e Fushë Kosovës 5 raste, komuna e Mitrovicës 3 raste, komuna e Ferizajt 2 raste, dhe me nga 1 rast komunat: Drenas, Rahovec, Klinë, Lipjan, Obiliq, Pejë, Suharekë, Viti dhe Vushtrri”, thuhet në komunikatën e IKSHPK-së.

Ndërsa, sot më 25 qershor 2020, janë shëruar 75 pacientë derisa numri i përgjithshëm i të shëruarve deri më sot është gjithsej 1.246 raste, kurse raste aktive 1144.

Ndryshe, gjatë vizitës që pati sot ministri i Shëndetësisë, Armend Zemaj në Komunën e Prishtinës, u bë e ditur se në kryeqytet janë afërsisht edhe 400 raste aktive me COVID-19.

Lexo po ashtu Zemaj thotë se rastet me coronavirus u rritën pas lirimit të masave dhe tubimit të 12 qershorit

Gjatë këtij takimi, kryetari i Prishtinës, Shpend Ahmeti tha se në kryeqytet janë rreth 400 raste me COVID-19, mirëpo theksoi se janë duke menaxhuar situatën.

“Diku i kemi përafërsisht 400 raste aktive në kryeqytet dhe natyrisht ky komunikim dhe monitorim bëhet edhe më i vështirë. Po e them që deri më sot jemi në gjendje të raportojmë dhe të kemi situatën në kontroll sa i përket rasteve aktive, monitorimit të tyre dhe po ashtu të ndalim hovin e shpejtë të virusit që do të na shkaktonte probleme të mëdha”, tha Ahmeti.

Kurse, Zemaj para kryetarit Ahmeti paralajmëroi testime masive për COVID-19.

Sipas IKSHPK-së, nga data 08 shkurt deri më 25 qershor 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 22.725 persona të dyshimtë në virusin SARS-CoV-2 dhe prej tyre pozitive rezultojnë gjithsej 2.432 raste, me gjithsej 42 raste të vdekjes të cilët kanë pasur sëmundje të tjera shoqëruese. /Telegrafi/