Komandanti i KFOR-it takon homologun e tij armen, fokus siguria dhe dialogu Kosovë-Serbi

Komandanti i misionit të KFOR-it të udhëhequr nga NATO, Major General Enrico Barduani, takoi Komandantin e Brigadës Armeniane të Paqes, Kolonel Hamlet Levonyan, në selinë e KFOR-it, në Kampin Film City në Prishtinë.

Në këtë takim, u diskutuan disa çështje, përfshirë sigurinë afatgjate në Kosovë, situatën e stabilitetit rajonal dhe përpjekjet e KFOR-it në mbështetje të dialogut të lehtësuar nga BE-ja mes Prishtinës dhe Beogradit.

Major General Barduani, duke folur për kontributet e Armenisë në KFOR, shprehu vlerësimin e tij për “kontributet e gjata të Brigadës Armeniane në KFOR dhe në stabilitetin rajonal”.

KFOR vazhdon të zbatojë mandatin e tij, i cili bazohet në Rezolutën e Këshillit të Sigurimit të OKB-së 1244 të vitit 1999, për të kontribuuar në krijimin e një ambienti të qetë dhe të sigurt për të gjithë njerëzit dhe komunitetet që jetojnë në Kosovë, si dhe për të garantuar lëvizjen e lirë.

KFOR punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në rolet e tyre përkatëse si përgjegjës të sigurisë. /Telegrafi/