Kim Kardashian gjobitet nga policia e Los Angelesit, për shkak të xhamave të zinj në veturën e saj ‘Tesla’

Stili i Kim Kardashianit mund të ndalojë trafikun, por këtë javë ishte Tesla Cybertruck-u i saj që tërhoqi vëmendjen e policisë në Los Angeles.

44-vjeçarja u ndalua nga një polic teksa po udhëtonte në rrugën PCH (Pacific Coast Highway) në mjetin e saj futuristik, pasi xhamat e saj të përparmë ishin shumë të errët për rregulloret e automjeteve në Kaliforni, raporton TMZ.

Sipas burimeve, Kim “qëndroi e qetë” gjatë ndalimit, edhe pasi mori një gjobë për t’u rregulluar. Ky lloj paralajmërimi i mundëson të shmangë një gjobë më të madhe nëse korrigjon xhamat dhe paraqitet në stacionin e policisë për të provuar rregullimin”, shkruan DailyMail.

Nuk është hera e parë që Kim përballet me probleme për xhamat e errët. Në vitin 2013, ajo mori një paralajmërim për të njëjtin problem në një automjet tjetër ndërsa po udhëtonte në Calabasas.

Kim shtoi Cybertruck-un në koleksionin e saj të veturave në shkurt 2024, ndërsa në maj prezantoi një tjetër version me ngjyrë të zezë mat, duke vazhduar të tregojë dashurinë e saj për automjetet luksoze dhe futuristike.

Ndërkohë që përballet me çështje ligjore në jetën reale, Kim po përgatitet të luajë rolin e një avokateje në projektin e ardhshëm të Ryan Murphy, “All’s Fair”.

Seriali, që fokusohet në një firmë ligjore të përbërë tërësisht nga femra, përfshin emra të njohur si: Naomi Watts, Sarah Paulson, Niecy Nash dhe Teyana Taylor.

Kim dhe Murphy bashkëpunuan për herë të parë në “American Horror Story: Delicate”, i cili u publikua më 20 shtator 2023.

Në këtë serial, Kardashian debutoi në një rol të madh si Siobhan Walsh, një grua që përballet me sfida surrealiste dhe të çuditshme gjatë shtatzënisë.

Pas suksesit të saj në këtë rol, Kim firmosi një rol për “All’s Fair”, një serial dramatik që përshkruhet si një procedural i sofistikuar, seksi dhe modern.

Seriali do ta shfaqë atë në rolin e një avokateje të fuqishme divorci në Los Angeles.

“All’s Fair”, krijuar nga Jon Robin Baitz (Brothers & Sisters, Feud: Capote Vs. The Swans) dhe Joe Baken, është pjesërisht i frymëzuar nga avokatja reale e Kardashian-it, Laura Wasser, e cila e përfaqësoi atë në divorcin me Kanye West dhe Kris Humphries.

Halle Berry fillimisht ishte pjesë e kastit elitar të serialit, por u detyrua të largohej për shkak të konflikteve në agjendë.

Kardashian, së bashku me nënën dhe menaxheren e saj Kris Jenner, Ryan Murphy, Baitz dhe Baken, do të jenë producentë ekzekutivë të serialit. /Telegrafi/