Këtë javë dy seanca, Kusari – Lila arsyeton mospërmbushjen e agjendës parlamentare, flet për “Ballkanin e Hapur”

Këtë javë dy seanca, Kusari – Lila arsyeton mospërmbushjen e agjendës legjislative, flet për “Ballkanin e Hapur”

Ushtruesja e detyrës së shefit të Grupit Parlamentar të Lëvizjes Vetëvendosje, Mimoza Kusari-Lila ka bërë të ditur se këtë javë do të mbahen dy seanca të Kuvendit të Kosovës. Ndërkohë që sa i përket përmbushjes së agjendës legjislative ka thënë se ka qenë shumë ambicioze. Ka folur edhe për “Ballkanin e Hapur”, për çka ka thënë se Kosova nuk përfiton asgjë nga pjesëmarrja në këtë samit.

Në një konferencë për media të mbajtur pas mbledhjes së Kryesisë, Kusari -Lila ka bërë të ditur se të enjten Kuvendi do të mblidhet për të votuar Ligjin për Inspektimet, ndërsa të premten do të ketë seancë të re të Kuvendit, ku do të shqyrtohen afër 40 projektligje.

“Seanca e re e Kuvendit do të mbahet ditën e premte, më datë 24 dhjetor, ndërsa ditën e enjte seanca mblidhet për të votuar Ligjin mbi Inspektimet, ligj ky i cili u dakorduam që të kalojë në Kuvend në procedurë të shpejtë, si pjesë e pakos së tri ligjeve të reformës së përgjithshme, të ndërlidhura me asistencë për Kosovën nga Banka Botërore”, ka thënë ajo.

Sa i përket asaj se sa është përmbushur agjenda parlamentare, Kusari – Lila ka thënë se kjo e fundit ka qenë shumë ambicioze, derisa ka shtuar se nuk mund të flasë për përqindje pasi që disa projektligje ende janë në procedura.

Ndonëse mazhoranca u kritikua nga Partia Demokratike e Kosovës për mospërmubushje të agjendës legjislative, u.d. shefja e GP të LVV-së tha se ka pasur dinamikë të punës së Kuvendit, por që është penguar nga zgjedhjet lokale.

“Agjenda legjislative ka qenë shumë amicioze, ndërsa ne kemi pasur ngarkesë në shumë procese, të cilat e kanë përcaktuar periudhën aktive të punës së Kuvendit. E para ka qenë se Kuvendi ka filluar të funksionojë si duhet vetëm pas zgjedhjes së Presidentes, në prill të këtij viti, atëherë kur bëheshin përpjekje të GP për të shkuar në një proces kredibil, i cili nuk do të shtynte vendin në zgjedhje tjera dhe ajo ndodhi. Pastaj, kemi pasur zgjedhjet lokale, gjë që ka ndikuar. Megjithatë në periudhat tjera kemi pasur një dinamikë të përshpejtuar dhe ne nuk mund të themi se sa kemi arritur të plotësojmë agjendën legjislative në përqindje vetëm pas mbylljes së sesionit vjeshtor”, tha ajo derisa shtoi se një numër projektligjesh janë në procedurë.

Samitin “Ballkani i Hapur”, i cili së fundmi mori pëlqimin e Bashkimit Evropian, Kusari – Lila e ka quajtur pengesë për proceset nëpër të cilat po kalon Kosova, duke përfshirë edhe dialogun me Serbinë.

Sipas saj, Kosova ka nevojë për një iniciativë në të cilën trajtohet si e barabartë.

“Sa i përket ‘Open Balkan’, vetëm një gjë dua të them, se edhe në marrëveshjet e ‘Open Balkan’ Kosova referohet si shtet që është subjekt i vendimeve të dialogut. Do të thotë, për Kosovën nuk ka asnjë përfitim të vetëm në raport me pjesëmarrjen në këtë iniciativë. Z. Rama e dinë këtë, z. Zaev e dinë këtë, z. Vuçiq e dinë këtë. Ata po mundohen që bashkëpunimet ndërmjet vete t’i mbulojnë me të tjerët, në të kundërtën për Kosovën nuk do të ndryshojë asgjë. Kosova do të mbetet peng i diskutimit në Bruksel, gjegjësisht vendimeve nga dialogu”, theksoi ajo derisa përmendi disa nga problemet me të cilat përballen qytetarët e Kosovës për shkak të politikave të Serbisë.