Katari bëhet kombi i dytë mysliman, qytetarët e të cilit mund të udhëtojnë pa viza në SHBA

Katari bëhet vetëm vendi i dytë me shumicë myslimane që qytetarët e saj mund të udhëtojnë pa viza drejt Shteteve të Bashkuara Amerikës.

Departamentet e Shtetit dhe të Sigurisë Kombëtare njoftojnë së bashku se Katari kishte përmbushur kërkesat e rrepta të përshtatshmërisë për t’u bashkuar me programin e heqjes së vizave.

Këto kërkesa përfshijnë një shkallë të ulët të refuzimit të vizave, një shkallë të ulët të tejkalimit të vizave dhe një kërkesë për trajtim reciprok të udhëtarëve amerikanë, të cilët tashmë lejohen të vizitojnë Katarin pa vizë deri në 30 ditë, shkruan timesofisrael.

“Katari ka qenë një partner i jashtëzakonshëm për Shtetet e Bashkuara dhe marrëdhënia jonë strategjike vetëm sa është forcuar gjatë viteve të fundit”, thonë departamentet në një deklaratë dhe shtohet se “kjo është dëshmi e mëtejshme e partneritetit tonë strategjik dhe angazhimit tonë të përbashkët për sigurinë dhe stabilitetin”.

Katari, i cili ka luajtur një rol kyç në përpjekjen për të negociuar një marrëveshje armëpushimi në Gaza dhe ishte një partner i rëndësishëm i SHBA-së para dhe gjatë tërheqjes amerikane nga Afganistani, është vendi i 42-të që pranohet në program.

Shumica e vendeve, qytetarët e të cilëve mund të vizitojnë SHBA-në pa viza, janë aleatë të vjetër në Evropë dhe Azi.

Theksojmë se vendi tjetër mysliman që qytetarët e saj mund të udhëtojnë pa viza drejt SHBA-së është Brunei.

Ndryshe, edhe pse popullsia e Katarit është pak më shumë se tre milionë banorë, vetëm një përqindje e vogël e tyre – rreth 320 mijë – janë në të vërtetë katarianë që do të kualifikoheshin për programin nëse kanë pasaporta të vlefshme. Shumica dërrmuese e njerëzve që jetojnë në Katar janë punëtorë të huaj dhe emigrantë të tjerë që nuk kanë pasaporta të Katarit. /Telegrafi/