Kampionati i ardhshëm i Serie A me shumë risi, mendohet edhe për ndryshime drastike pas dy vitesh

Bëhuni gati për një Seri A ndryshe nga kampionati i ardhshëm.

Të paktën këtë ka paralajmëruar presidenti i Federatës Italiane të Futbollit, Carlo Tavechio, i cili njëherësh është ngarkuar edhe me detyrën e komisarit të jashtëzakonshëm të Ligës.

Së pari, nga sezoni i ardhshëm pritet të ndryshojnë oraret e ndeshjeve, duke marrë për bazë modelin e La Ligës spanjolle.

Pra tri ndeshje të shtunën në tre orare të ndryshme, një të dielën në 12:30, tri në 15:00, një në 18:00, një në 20:45 dhe një ndeshje të hënën në 20:45.

Gjithçka për të përfituar sa më shumë nga shpërndarja e të drejtave televizive.

Një ndryshim tjetër lidhet me përdorimin e teknologjisë VAR, e njohur ndryshe si gjyqtari asistent për video, që do t’u mundësojë gjyqtarëve të ndryshojnë vendimet në çast me ndihmën e kamerave të posaçme, transmeton Panoramasport.

Nëse risitë e mësipërme ishin për të ardhmen e afërt, po mendohen ndryshime edhe në planin afatgjatë.

Fjala është për futjen e playoff-it dhe playout-it për skuadrat që ngjiten dhe ato që zbresin në Serie A.

Gjithashtu është hedhur edhe ideja e uljes së numrit të skuadrave nga 20 në 18.