Johnson pas takimit me Zelenskyn në Kiev: Ndihma ushtarake duhet ta dëbojë Rusinë nga Ukraina

Duke folur në një konferencë të përbashkët shtypi në Kiev me presidentin ukrainas, Volodymyr Zelenskyy, Boris Johnson ka premtuar mbështetje të vazhdueshme për Ukrainën.

Mbretëria e Bashkuar ka ofruar ndihmë për trajnimin e mijëra ushtarëve ukrainas në mes të konfliktit – dhe kryeministri britanik tha se qëllimi ishte të ndihmonte Ukrainën të largonte forcat ruse nga vendi.

“Ne do të vazhdojmë, siç kemi që nga fillimi, të ofrojmë pajisjet ushtarake që ju nevojiten – dhe tani, sigurisht, trajnimin që mund të jetë i nevojshëm për të shkuar me ato pajisje të reja – në mënyrë që ju, populli ukrainas, forcat e armatosura ukrainase të jeni në gjendje të bëjnë atë që unë besoj se ukrainasit dëshirojnë të bëjnë, dhe kjo është të dëbojnë agresorin nga Ukraina”, tha ai, raporton skynews.

“Ky do të jetë momenti për bisedimet për të ardhmen e Ukrainës dhe do të jetë në atë kontekst të një Ukrainë të lirë që ne dhe vendet e tjera do të bëjmë angazhimet dhe garancitë e sigurisë që kemi diskutuar kaq shpesh”, shtoi Johnson.

Ai tha se ka “prova” se trupat ruse janë nën “presion akut” dhe po marrin “viktima të shumta”.

“Shpenzimet e tyre për municione – predha dhe armatime të tjera – janë kolosale. Pas 114 ditësh sulmi në Ukrainë, ata ende nuk i kanë arritur objektivat që përcaktuan për javën e parë”, pohoi i pari i qeverisë britanike.

“Ne jemi këtu edhe një herë për të nënvizuar se jemi me ju për t’ju dhënë qëndrueshmërinë strategjike që do t’ju nevojitet dhe ne do të ndihmojmë për të vazhduar intensifikimin e sanksioneve ndaj regjimit të Putinit”, tha ai.

Kryeministri britanik shtoi se ai e kupton pse Ukraina nuk mund të bëjë “kompromise” me Rusinë. /Telegrafi/