Iranit i bëhet thirrje të lirojë gruan e arrestuar pasi u zhvesh në universitet

Aktivistët e të drejtave të njeriut u kanë bërë thirrje autoriteteve në Iran që të lirojnë një grua që u ndalua pasi hoqi rrobat e saj në një universitet, në atë që ata thanë se ishte një protestë kundër ligjeve të detyrueshme të hixhabit.

Një video u shfaq në mediat sociale të shtunën që tregon gruan me të brendshme të ulur në disa shkallë, dhe më pas duke ecur me qetësi përgjatë një trotuari në Degën e Shkencës dhe Kërkimit të Universitetit Islamik Azad në Teheran.

Në një video të dytë, gruaja duket hequr të brendshmet. Menjëherë pas kësaj, agjentët me rroba civile shihen duke e ndaluar me forcë dhe duke e shtyrë në një veturë, transmeton Telegrafi.

Universiteti Azad tha se gruaja vuante nga një “çrregullim mendor” dhe ishte dërguar në një “spital psikiatrik”.

Shumë iranianë në mediat sociale e vunë në dyshim këtë pretendim dhe i portretizuan veprimet e saj si pjesë e lëvizjes “Gruaja, Jeta, Liria”, që ka parë që shumë gra të kundërshtojnë publikisht ligjet që u kërkojnë atyre të mbulojnë flokët dhe të veshin veshje të gjata dhe të gjera.

Më shumë se 500 njerëz raportohet se u vranë gjatë protestave mbarëkombëtare që shpërthyen dy vjet më parë pasi një grua kurde, Mahsa Amini, vdiq në paraburgim nga policia pasi u arrestua për mosmbajtjen e hixhabit “si duhet”. /Telegrafi/