Investitorët spanjoll kërkojnë treg në Kosovë

Me ftesë të Aleancës Kosovare të Bizneseve (AKB), një delegacion prej pesëmbëdhjetë bizneseve nga Spanja, po qëndron në një vizitë tre ditore në Kosovë, me qëllim të thellimit të bashkëpunimit e gjetjes së formave për rritje të investimeve nga ky vend.

Bizneset spanjolle kanë vizituar AKB-në, ku janë pritur nga kryetari Agim Shahini, i cili informoi delegacionin e bizneseve spanjolle lidhur me infrastrukturën ligjore dhe atë fizike si më të avancuarat në Ballkanin perëndimor, duke tentuar ti josh edhe në aspektin ekonomik dhe atë politik për të lëvizur këto dy vende drejt një bashkëpunimi bilateral në të gjitha fushat duke përfshirë edhe diplomacinë ekonomike.

Spanja është një vend me potencial të madh, kurse Kosova është një vend strategjik për Ballkanin perëndimor, sepse autostradat e ndërtuara së fundi e bëjnë që Kosova të ketë qasje në të gjitha korridoret rrugore për një kohë më të shkurtër e me të lirë për të arritur mallrat në destinacionin e duhur.

“Pavarësisht ngërçit politik ndërmjet dy vendeve tona, ne duhet që ato t‘i përmirësojmë raportet me bashkëpunim ekonomik, duke bindur edhe Madridin zyrtar se këtyre dy vendeve iu mungon bashkëpunim bilateral në çdo fushë dhe këtë duhet ta bëjë shteti spanjoll sikur e kanë bërë edhe shtetet tjera të Bashkimit Evropian“, tha Shahini.

Ai i njoftoi bizneset spanjolle edhe për potencialet e mundësitë e shumta që ofron Kosova për investime si dhe për lehtësirat e favorshme, ku taksat janë më të ulëtat në rajon, fuqia më e re, e aftë dhe përgatitur profesionalisht për punë dhe kushte tjera të cilat janë të dobishme për investitorët

Alberto Garcia Rojas, udhëheqës i investitorëve spanjoll tha se bizneset nga vendi i tij janë të interesuar të vijnë e investojnë në Kosovë, por po ashtu dhe të eksportojnë nga Spanja. Ai tregoi se këtu janë 15 biznese nga industria mishit, aluminit, elektrikes, ndriçimit, instalimit, lëkurës, përpunimit të këpucëve, të prodhimit të verërave, parfumerisë e detergjenteve, shërbimeve juridike, ato ambulantive e të tjera.

“Është hera e parë që jemi në Kosovë dhe kjo po na ndryshon bindjen se Kosova është shumë më mirë sesa ne kemi menduar“, tha ai.

Investitorë spanjoll treguan se janë shumë të interesuar për investime në Kosovë, eksporte të prodhimeve të tyre, por edhe import të prodhimeve kosovare. /Telegrafi/