Interi shkatërron Sampdorian në udhëtim, Icardi shënon katër gola

Interi ka shënuar fitore të madhe dhe të thellë në udhëtim te Sampdoria me rezultat 5-0 në ndeshjen e vlefshme për javën e 29-të në Serie A.

Skuadra e Luciano Spallettit ka filluar ta rikthej formën pas dy muajve pa fitore në Serie A, ku në tri ndeshjet e fundit ka dy fitore dhe një barazim.

Nerazzurët kanë treguar formë të lartë në udhëtimin e sotëm (e diel) te Sampdoria, ku kryesorët ishin sulmuesi Mauro Icardi me katër gola dhe Ivan Perisic me një.

Goli i parë i ndeshjes erdhi në minutën e 26-të, ku Ivan Perisic shënoi një gol të bukur me kokë pas harkimit të Joao Cancelos për t’i kaluar të tijët në epërsi 1-0.

Pas Perisicit erdhi radha e kapitenit Icardi, i cili fillimisht shënoi nga penalltia në minutën e 30-të për 2-0, ndërsa një minutë më vonë shënoi gol të bukur me thembër për 3-0.

Se sulmuesi argjentinas ishte në formë të lartë e tregoi edhe goli i tretë personal, ku në minutën e 44-të shënoi nga afërsia për 4-0 dhe dërgoi skuadrën e tij në pushim.

Në pjesën e dytë, përsëri në pah doli Icardi, duke shënuar në minutën e 51-të për 5-0, ndërsa në vazhdimin e ndeshjes Interi edhe përkundër rasteve të shumta nuk shënoi më dhe në fund fitoi me rezultat përfundimtar 5-0.

Pas kësaj fitore, Nerazzurët ngjiten në pozitën e katërt me 55 pikë, ndërsa Sampdoria mbetet në pozitën e shtatë me 44 pikë.

Në ndeshjen e radhës, Interi luan në shtëpi ndaj Hellas Veronas, ndërsa Sampi udhëton te Chievo. /Telegrafi/

https://www.dailymotion.com/video/x6ghnms

https://www.dailymotion.com/video/x6ghobt

https://www.dailymotion.com/video/x6ghpmx