Humanizmi është heroizëm!

Se njerëz vullnetmirë ka kudo dhe në çdo kohë tregon edhe aktiviteti i Shoqatës humanitare’ Heroinat’, me drejtoreshë Znj. Shkurte Haxhiun, e cila këtyre ditëve përfitoi donacion me karroca speciale për fëmijët me nevoja të veçanta nga Shoqata simotër ‘Nora’, me drejtues ztr. Xhevdet Gashi, i cili jeton dhe vepron në Zvicër

Fëmijët me aftësi të kufizuara përfaqësojnë një nga grupet më të margjinalizuara dhe më të përjashtuara. Fëmijë të tillë shpesh janë anëtarë të pjesës më të cenueshme të popullsisë, qasja e të cilëve në shërbimet shëndetësore është e kufizuar.

Ne e dimë se për të ndihmuar këta fëmijë që të realizojnë të drejtat e tyre, ekziston nevoja për t’i mbështetur, për të luftuar stigmën në komunitet dhe për të trajtuar mungesën kryesore të ndihmave dhe shërbimeve.

Pavarësisht granteve të cilat shpesh janë vetëm deklarative dhe jo të mjaftueshme, Shoqata “Heroinat” ka nevojë për ndihmë nëpërmjet donacioneve të ndryshme, sepse familjarët nuk mund të mbulojnë në mënyrë të pavarur shpenzimet e trajtimit dhe përshtatjes së këtyre fëmijëve për t’u bërë anëtarë të vlefshëm të shoqërisë sonë.

Duke luftuar kundër damkosjes dhe duke ofruar një mjedis të këndshëm, këta fëmijë me ndihmën e këtyre karrocave, kanë një shans më të mirë për të t’u qasur në kujdesin shëndetësor dhe për t’u përfshirë më mirë në shoqëri.

“Heroinat” mbledh dhe lidh fëmijët me nevoja të veçanta, ndihmon në zbatimin e programeve rehabilituese dhe edukative, kujdeset për në fushën e mbrojtjes sociale dhe shëndetësore, rehabilitimit, furnizon me ndihmat e nevojshme, organizon programe dhe shfaqje të veçanta dhe aktivitete të tjera të ndryshme me qëllim përmirësimin e kushteve të jetesës dhe shëndetit të këtyre fëmijëve.

– Duket se ka ardhur koha që të mbështeten iniciativa të tilla, sikur ky veprim vullnetmirë nga aktivisti ztr. Xhevdet Gashi. Ne punojmë edhe me vullnetarë dhe ndërgjegjësimi gjithnjë e më shumë po rritet. Para së gjithash, të gjithë duhet të sensibilizohemi për çështje të tilla. Ndërsa, këta fëmijë meritojnë ndjenjën e vlerës dhe aftësisë, dhe pa to, shoqëria nuk mund të përparojë – vuri në dukje Shkurta Haxhiu.

Pra, përmes këtyre formave, Shoqata humanitare ‘Heroinat’, sikur po përmbushë thënien e Shenjtores, humanistes Nëna Tereze ‘Bëni punë të vogla, me dashuri të madhe’! /Telegrafi/