Hendboll: Besa Famgas triumfon ndaj Prishtinës për ta fituar Kupën e Kosovës

Me një ndeshje shumë të fortë ka përfunduar edicioni 2019/2020 në hendbollin kosovar. Besa Famgas ka kompletuar një edicion perfekt duke ia shtuar Kupën e Kosovës trofeut të kampionit që e kishte fituar më herët.

Besa Famgas në finale të Kupës së Republikës së Kosovës (meshkujt) e mposhti Prishtinën me rezultat të ngushtë, 23-21. Finalja u luajt në Pallatin e Rinisë në Prishtinë.

Kupën për Besën e kanë ndarë ministrja për Kulturë, Rini dhe Sport, Vlora Dumoshi dhe presidenti i FHK-së, Eugen Saraçini. Medaljet e arta për lojtarët e Besës i kanë ndarë presidenti i KOK-ut, Besim Hasani dhe Ibër Alaj, drejtor i Departamentit të Sportit.

Armand Çakalli i Federatës Shqiptare të Hendbollit dhe Afërdita Fazlija, zv. drejtoreshë e DS ndanë medaljet e argjendta për Prishtinën.

Finalja ishte shumë e fortë, bindshëm ndeshja më e fortë e këtij edicioni.

Prishtina kishte epërsi fillestare kurse rezultati u barazua në minutën e 11-të. Më pas Besa Famgas kaloi në epërsi kurse pjesa e parë përfundoi me rezultat 12:10. Rezultati i ngushtë ishte edhe gjatë gjithë pjesës së dytë. Prishtina u afrua në një gol në katër raste, por pa ia dalë të barazojë. Loja ishte e hapur deri në fund. Sidomos në mbrojtje skuadrat ishin pa kompromis.

Te Besa Famgas u dallua me efikasitet Drilon Tahirukaj me 10 gola. Kontribut dha edhe portieri Arti Luzha si dhe gjithë të tjerët. Te Prishtina tetë gola i shënoi D. Terziqi, kurse pritje të shumta kishte portieri Armir Agushi.