Haradinaj ngushëllon familjarët e viktimave pas aksidentit në Rahovec

Kryeministri në dorëheqje, Ramush Haradinaj, ka ngushëlluar familjarët e viktimave në Bërnjak të Rahovecit, pas aksidentit.

Në një postim në llogarinë e tij në Facebook ai ka shprehur shqetësimin e tij për aksidentet në komunikacion, duke apeluar tek qytetarët të shtojnë kujdesin në trafik.

“I shqetësuar nga lajmet për aksidentet e shpeshta në komunikacion me pasojë jetët njerëzore. Familjarëve të viktimave në Bërnjak të Rahovecit iu shpreh ngushëllime të thella, kurse të lënduarve shërim të shpejtë. Apeloj të gjithë qytetarët që ta shtojnë kujdesin në trafik, e Policia e Kosovës të rris kontrollin, veçanërisht tani gjatë sezonës verore, kur kemi një komunikacion të ngarkuar”, ka shkruar ai.

Ndryshe një aksident i rëndë komunikacioni ka ndodhur sot, në fshatin Bernjak të Rahovecit, si pasojë tre persona kanë vdekur dhe katër të tjerë janë lënduar.

Lajmin e ka konfirmuar zëdhënësja e Policisë për rajonin e Gjakovës, Lirije Podrimaj.

“Informacioni i fundit nga vendi i ngjarjes është se edhe personi i tretë ka vdekur, viktimat janë dy meshkuj dhe një femër”, ka thënë Lirie Podrimaj, zëdhënëse e policisë për rajonin e Gjakovës.

Sipas Podrimajt bazuar në informacionet e para nga vendi i ngjarjes dyshohet se aksidenti i ndodhur në mes të dy automjeteve udhëtarësh ka ndodhur si pasojë e mos përshtatjes së shpejtësisë dhe tejkalimit në mënyrë të pa sigurt./Telegrafi/