Barcelona e vazhdoi formën fantastike në vitin 2025 me një fitore të thellë ndaj Real Sociedadit pasditen e së dielës. Është një rezultat i cili është një vazhdimësi e formës së mirë të blaugranasve, diçka që ishte e nevojshme para duelit të parë ndaj Benficas në Ligën e Kampionëve. Misioni i Barcelonës u bë edhe më i lehtë kur kapiteni i Sociedadit, Aritz Elustondo u ndëshkua me karton të kuq pas 16 minutave lojë, andaj Hansi Flick e ka pranuar se ky moment ndryshoi gjithçka. “Kartoni i kuq e ndryshoi ndeshjen shumë. Ata janë një skuadër e mirë, por mendoj se ne bëmë presion tek ata dhe e merituam rezultatin”.
“Edhe nëse ishin me dhjetë, është e rëndësishme që të mos pësonim raste. Ne kemi folur për këtë gjatë javës pas ndeshjes ndaj Atleticos”.
“Ndoshta me pak më shumë disiplinë ne do të shënonim edhe disa gola të tjerë por nuk ndodhi. Jam i lumtur për Casado dhe Gerard Martin, të cilët shënuan golat e tyre të parë”, ka deklaruar Flick.
Robert Lewandowski ishte në mesin e golashënuesve për Barcelonën dhe në këtë mënyrë ai e rriti epërsinë ndaj rivalëve të tij në garën për ‘Pichichi’. “Për një numër nëntë, të shënosh është gjithmonë e rëndësishme. Është e vërtetë që ai pati pak fat, por ai është gjithmonë aty dhe për të është e rëndësishme”, përfundoi gjermani./Telegrafi/
