Hahn kërkon kompromis për taksën, thotë se të paktën të pezullohet

Komisioneri për Politikat Evropiane të Fqinjësisë dhe Negociatat e Zgjerimit, Johannes Hahn, pas takimit me presidentin e Republikës së Kosovës, Hashim Thaçi, edhe një herë ka bërë thirrje për siç ka thënë “së paku, pezullimin e taksës ndaj produkteve serbe”.

Siç ka shkruar në Twitter, Hahn, është e rëndësishme që dialogu ndërmjet Kosovës dhe Serbisë të rinisë me shpejtësi, përcjell Telegrafi.

“Takim i mirë me presidentin Hashim Thaçi. Është e rëndësishme që dialogu Kosovë-Serbi të rinisë me shpejtësi, gjithashtu është edhe në interes të stabilitetit dhe progresit më të gjerë rajonal. Unë përsërita qëndrimin e Bashkimi Evropian se taksa ndaj prodhimeve serbe duhet të paktën të pezullohet”, ka shkruar ai në Twitter.

Lexo po ashtu Haradinaj i ashpër me Mogherinin e Hahnin, kërkon nga BE-ja të refuzojë thirrjet për tragjedi të reja në Ballkan (Video)

Ndryshe, në një intervistë për The Washington Post, Hahn kishte deklaruar se “Tani për tani, askush nuk mund të parashikojë se çfarë do të ishte një rezultat final”.

Megjithatë, sipas tij, “një shkëmbim i mundshëm i territorit mund të jetë si një pjesë e vogël e fundit, e marrëveshjes përfundimtare”.

Për një deklaratë të tillë ka ardhur edhe reagimi i kryeministrit të Kosovës, Ramush Haradinaj.

Lexo po ashtu Thaçi në Bruksel: BE-ja duhet ta marrë vendimin e vonuar për heqjen e vizave

Haradinaj sërish është treguar i ashpër në raport me Bashkimin Evropian, ku ka drejtuar akuza ndaj përfaqësueses së BE-së, Federica Mogherini dhe komisionarit evropian për Zgjerim, Johaness Hahn.

Haradinaj ka thënë se Mogherini dhe Hahn i kanë humbur një vit BE-së dhe Ballkanit me deklaratat e tyre për korrigjim të kufijve.

Sipas tij, nëse nuk do të flitej për këtë temë, ndoshta marrëveshja mes Kosovës dhe Serbisë do të mund të arrihej.

Ndryshe kryeministri ka reaguar edhe përmes një postimi në Twitter, ku ka shkruar se rikthimi i idesë së shkëmbimit të territoreve nga Johannes Hahn, është thirrje për tragjedi të reja në Ballkan, dhe përpjekje për ta sforcuar takimin që do të mbahet në Berlin. /Telegrafi/