Gjykimi për 400 kilogramë kokainë, përfundon dëshminë asistentja e Departamentit të Importit të kompanisë ku u gjet droga

Në gjykimin ndaj Izet Sheqirit, Kadri Sheqirit, Faton Vrajollit, Kadri Brahimit dhe Fehmi Bytyçit, të akuzuar për rastin e 400 kilogramëve kokainë që ishin gjetur në oborrin e kompanisë “MC Food” në hyrje të Lipjanit në vitin 2021 në seancën e 24.10.2024 ka përfunduar dëshminë dëshmitarja Mimoza Haxha, e cila kishte filluar dëshminë në seancën e datës 27.03.2024.

Dëshmitarja Mimoza Haxha në kompaninë “MC Food” kishte mbajtur pozitën e asistentes në Departamentin për Import.

Kujtojmë se në seancën e mbajtur më 23.09.2024 ka filluar gjykimi rishtazi për shkak se është ndërruar trupi gjykues.

Arsyeja pse është ndërruar trupi gjykues është pensionimi i kryetarit të trupit gjykues, Musa Konxheli. Ndërsa anëtarja e mëhershme, Valbona Musliu Selimaj, është avancuar në Gjykatën e Apelit.

Dëshmitarja Mimoza Haxha gjatë seancës së sotme u përgjigj në pyetjet e avokatëve të të akuzuarve pasi që prokurori Valdet Gashi tha se qëndron pranë pyetjeve të cilat i ka bërë më herët dhe ndonjë pyetje tjetër shtesë nuk kishte.

Prokurori kërkoi nga dëshmitarja që të deklarohej në rast se i mbështeste deklaratat e mëhershme që i kishte dhënë kur ishte përgjigjur para trupit gjykues.

“Unë i mbështes të gjitha përgjigjet e mia që i kam dhënë në atë seancë dhe sa i përket pyetjeve të parashtruara atëherë nga prokurori nuk kam diçka tjetër të shtoj”, tha dëshmitarja Mimoza Haxha.

Ndërsa mbrojtësi i të akuzuarit Izet Sheqiri, avokati Florent Latifaj, e pyeti në lidhje me procedurën e porositjes së mallit, transportit dhe arritjes së mallit se a ka qenë gjithnjë e njëjtë.

“Procedurat kanë qenë gjithmonë të njëjta”, tha dëshmitarja Mimoza Haxha.

Edhe sa i përket porosisë së fundit dëshmitarja tha se procedurat kanë qenë gjithnjë të njëjta.

Dëshmitares i bëri pyetje edhe i akuzuari Izet Sheqiri. Ai e pyeti se a ka pasur ndonjë ndërhyrje nga ana e tij. “Jo, asnjëherë”, u përgjigj dëshmitarja Haxha.

Ndërsa avokati Leotrim Syla, i cili është mbrojtësi i Faton Vrajollit, e pyeti dëshmitaren se në momentin që bëhet porosia a lajmërohen nga drejtori i importit.

“Në momentin që bëhet porosia informohem nga drejtori i importit departamentit, Faton Vrajolli”, tha Haxha.

”Konfirmimet që keni pranuar zakonisht bëhen për periudha dymujore apo më shumë?”, ishte pyetja e radhës nga avokati Leotrim Syla.

“Sa më kujtohet porosit çdoherë janë bërë 2 deri në 3 muaj por jo më gjatë”, ishte përgjigja e dëshmitares Haxha.

Avokati Xhafer Maliqi, i cili është mbrojtësi i të pandehurit Kadri Sheqiri, e pyeti se a ka pasur takime lidhur me punën me Faton Vrajollin referuar periudhës janar-maj 2021.

“Periudha e cekur saktësisht nuk më kujtohet por që patjetër kemi pasur takime me Fatonin”, tha Haxha.

Avokati Driton Musliu, i cili është mbrojtësi i të akuzuarit Kadri Brahimi, nuk kishte ndonjë pyetje për dëshmitaren ndërsa avokati Ramë Dreshaj, i cili mbron të akuzuarin Fehmi Bytyçi, e pyeti dëshmitaren në lidhje me transportin e kontejnerit që tashmë e kanë objekt shqyrtimi.

“Pasi që ka kaluar periudhë shumë e gjatë nuk kisha pasur dëshirë të specifikoj diçka që unë nuk jam e sigurt por të gjitha pyetjet që m’u kanë bërë më herët, përgjigjet e mia qëndrojnë”, ishte përgjigjja e kësaj dëshmitare.

“Sepse më janë bërë pyetjet e njëjta”, shtoi tutje Haxha.

Shqyrtimi gjyqësor i radhës lidhur me këtë çështje pritet të mbahet gjatë muajit nëntor.

Ky rast po trajtohet nga trupi gjykues i përbërë nga gjyqtarët Ngadhnjim Arrni, Valon Kurtaj dhe Rrahman Beqiri.

Pesë të akuzuarit nuk e kanë pranuar fajësinë për veprat penale të cilat po u vihen në barrë nga Prokuroria, ndërsa i akuzuari Izet Sheqiri kishte thënë se ndihet fajtor vetëm për veprën penale – armëmbajtje pa leje.

“Sepse më janë bërë pyetjet e njëjta”, shtoi tutje Haxha.

Shqyrtimi gjyqësor i radhës lidhur me këtë çështje pritet të mbahet gjatë muajit nëntor.

Ky rast po trajtohet nga trupi gjykues i përbërë nga gjyqtarët Ngadhnjim Arrni, Valon Kurtaj dhe Rrahman Beqiri.

Pesë të akuzuarit nuk e kanë pranuar fajësinë për veprat penale të cilat po u vihen në barrë nga Prokuroria, ndërsa i akuzuari Izet Sheqiri kishte thënë se ndihet fajtor vetëm për veprën penale – armëmbajtje pa leje. /Kallxo.com/