Gjykata Kushtetuese pranon padinë e PD-së kundër projektit të menaxhimit të Parkut të Butrintit

Gjykata Kushtetuese në Shqipëri ka pranuar padinë e dorëzuar nga Partia Demokratike kundër projektit të qeverisë për menaxhimin e Parkut Arkeologjik të Butrintit.

Lajmi është bërë me dije nga deputetja e PD-së Ina Zhupa e cila përmes një statusi në rrjetet sociale sqaron se Kushtetuesja ka kërkuar nga të gjitha palët të çojnë argumente dhe prova brenda datës 23 Janar 2023.

“Viti nis mbarë me një lajm të mirë për Butrintin. Padia pranohet nga Gjykata Kushtetuese e cila fton të gjitha palët të çojnë argumente dhe prova brenda datës 23 Janar 2023. Më pas do zhvillohet seancë plenare publike. Gjykata Kushtetuese do rrijë në lartësinë e emrit dhe pozicionit që ka! Butrinti do të fitojë!” shkroi Zhupa në Facebook.

Padia, e firmosur nga 36 deputetë u depozituar në Gjykatën Kushtetuese në 14 nëntor.

Deputetja e PD-së Ina Zhupa disa muaj më parë akuzoi ministren e Kulturës Elva Margariti se po rrezikon historinë e shqiptarëve duke vendosur Richard Hodges në krye të Bordit për Butrintit.

Sipas Zhupës, Hodges ka bërë deklarata se Butrinti është tokë greke, e jo shqiptare. /Telegrafi/