Gjermania urdhëroi Rusinë të mbyllë katër konsullata ruse

Gjermania ka urdhëruar Rusinë të mbyllë katër konsullatat e përgjithshme ruse në atë vend deri në fund të vitit, një kundërmasë ndaj një vendimi të fundit të autoriteteve ruse për të kufizuar numrin e punonjësve në institucionet diplomatike dhe kulturore gjermane në Rusi.

“Qeveria gjermane ka vendosur të tërheqë lejen e punës për katër nga pesë konsullatat ruse në Gjermani”, njoftoi Ministria e Brendshme në një deklaratë të shkurtër.

Lexo po ashtu Shpërthim në kufirin që bashkon Bjellorusinë, Rusinë dhe Ukrainën

Të shtunën, Rusia mori një vendim për të vendosur një “kufi të sipërm” për punonjësit e institucioneve gjermane në Rusi, të tilla si misionet diplomatike, shkollat dhe institutet kulturore.

“Kjo e zvogëloi praninë totale gjermane në Federatën Ruse në 350 persona”, njoftoi Ministria e Punëve të Jashtme gjermane. Në njoftimin për shtyp thuhet se me këtë lëvizje Moska shkoi “në drejtim të përshkallëzimit” dhe se Gjermania “u fut në këtë situatë nga sjellja e Rusisë”.

Me shumë mundësi, ambasada dhe konsullata në Berlin do të qëndrojnë të hapura, ndërsa konsullatat e përgjithshme në Bon, Hamburg, Frankfurt dhe Leipzig do të mbyllen.

Siç u njoftua, Gjermania do të mbajë ambasadën dhe konsullatën në Moskë dhe konsullatën e përgjithshme në Shën Petersburg, raporton dw.

Marrëdhëniet midis Rusisë dhe Gjermanisë, dikur blerësi më i madh i naftës dhe gazit rus, janë përkeqësuar që nga pushtimi i Ukrainës në shkurt të vitit 2022, dhe Perëndimi është përgjigjur me sanksione dhe dërgesa armësh.

Gjermania planifikon të pushojë nga puna një numër të madh të stafit që punon në misionet e saj në Rusi pasi Moska vendosi kufizime në numrin e njerëzve të lejuar të punojnë në vend, duke përfshirë mësuesit dhe stafin në Institutin Goethe. /Telegrafi/