“Gjendje e mjerueshme te tregu i gjelbër” – qytetarët ankohen dhe kërkojnë ndërhyrje urgjente

Reshjet e dendura të borës në shumë qytete të Kosovës kanë krijuar vështirësi në qarkullimin e qytetarëve dhe automjeteve në disa zona.

Si rrjedhoj, qytetarët e Komunës së Vitisë kanë ngritur shqetësime për gjendjen e rënduar te tregu i gjelbër, duke ndarë me Telegrafin fotografi që pasqyrojnë situatën.

Skender Bucaliu, tregtar në këtë komunë, thotë se kushtet janë të mjerueshme, ku sipas tij, edhe blerësit po largohen nga tregu.

Ai ankohet se askush nuk e ka pastruar hapësirën pas reshjeve të borës këtë javë.

“Në këtë treg vijmë çdo javë, unë shes produkte ushqimore e blegtorale. Kushtet janë shumë të dobëta, nuk ka fare pastërti, nuk kemi as tezga as kushte tjera. Sidomos sot me reshjet e borës, ujë e baltë, skllotinë, hapësira nuk është pastru nga askush. As blerësit nuk mund të afrohen se nuk kanë mundësi prej borës e ujit në rrugë” tha ai.

Bucaliu thotë se e frekuentojnë këtë treg për të shitur ndonjë produkt sa për mbijetesë, por ankohet se nuk ka blerës.

“S’ka kushte, por nevoja na shtyjnë që të vijmë për mbijetesë po punojmë. U dasht me pastru vet vendin sado pak sa për blerësit se kështu s’ka shans me ardh klientët a me punu diçka, por s’po kem çare pa dal, s’kem kah t’ia mbajmë. Unë me sa e mbajë mend qe 20 vjet janë këto kushte të këqija, Nuk ka as ujë, as toalete, mungon higjiena. Ne tregtarët paguajmë një taksë rreth dy euro,” thotë Bucaliu.

Njëjtë shprehet edhe Naimi, një tjetër tregtar, që ndonëse janë ankuar tek institucionet lokale askush s’i ka dëgjuar.

“Gjendja e tregut në Viti qysh po e shihni edhe vet është katastrof. Nuk kemi as si t’i ekspozojmë produktet, kanë pasur mundësi së pakur me pastru hapësirën pas borës, por nuk ka dal askush nga komuna. Nuk ka kurrfarë mirëmbajtje, kur ka reshje gjendja bëhet edhe më e vështirë, sot është e pakalushme në këmbë hapësira, ujë e borë po e shihni edhe vet”, thotë Naimi.

Sipas tij, në Viti janë rreth 20 tregtarë të produkteve ushqimore e blegtorale dhe të tjerë që shesin veshmbathje e mallra tjera çdo të enjte.

“Kushte po shihet katastrof, mungesë e pastrimit, po duhet vetë me hek borën, as  nuk po mundemi me kalu. Kanë mujt me pastru dikush nga komuna, pesë minuta punë, s’ka pas ma shumë”, ankohet një banor i Vitisë që kishte dalur të shiste presh e perime tjera.

Ngjitur me tregun e gjelbër, ndodhet edhe tregu i shpezëve po ashtu në kushte të rënda e pa mirëmbajtje.

Në anën tjetër, konsumatorët pohojnë se kushtet e tregut janë shumë të këqija dhe për këtë arsye hezitojnë të blejnë produktet që ofrohen në tregun e qytetit.

“Gjendje e mjerueshme te tregu i gjelbër në Viti,” kanë komentuar ata, duke theksuar se bora e madhe e ka bërë thuajse të pamundur qarkullimin në këtë zonë.

Qytetarët kërkojnë nga autoritetet komunale që të ndërhyjnë sa më shpejt për pastrimin e hapësirave dhe për të siguruar qarkullimin e lehtë dhe të sigurt për të gjithë.

Ndryshe, Telegrafi ka kontaktuar me Komunën e Vitisë për të parë reagimet ndaj kësaj situate të krijuar dhe do të iu mbajë të informuar për detaje të tjera. /Telegrafi/