Frutex “pushton” tregun ndërkombëtar – për dy javë rrit eksportin edhe në 5 vende! (Foto)

Pronari i kompanisë “Frutex” nga Suhareka, kompani kjo që merret me prodhimin e lëngjeve, Shaqir Palushi, ka bërë të ditur se kjo kompani ka filluar eksportimin e produkteve të saj edhe në Liberi, Sllovaki dhe Kuvajt.

Kjo sipas tij është një vazhdimësi e rritjes së tregut të kësaj kompanie, rritje e cila javën e kaluar kishte ndodhur edhe në Belgjikë e Suedi, raporton Telegrafi.

“Gjatë vitin 2015 kemi eksportuar mbi 240 maune në 16 vende të botës, shpresojmë që këtë vit ta përfundojmë me një rritje prej 20 deri në 30 për qind të eksportit”, ka thënë Palushi.

Kjo kompani sot është vizituar edhe nga zyrtarë qeveritarë, përkatësisht edhe nga vetë kryeministri Isa Mustafa.

Duke shfrytëzuar prezencën e qeveritarëve, Palushi ka thënë se presin nga Qeveria që të vazhdojë me reformat e politikave dhe përmirësim të politikave fiskale.

“Neve në radhë të parë si prodhues do të na fuqizonin sepse mendoj se kompanitë prodhuese do të jenë promotor të zhvillimit të Kosovës, krijimit të vendeve të reja të punës dhe përmirësim të bilancit tregtar”, ka thënë Palushi.

Ai gjithashtu ka shtuar se si përpunues presin edhe ndikim pozitiv të MSA-së.

“Presim që hyrja në fuqi e MSA-së të ndikojë për prodhuesit në radhë të parë, përmes granteve të cilat janë paraparë në pesë vitet e ardhshme, një vlerë prej 500 milionë eurove. Natyrisht të krijojmë mundësi të rritjeve të kapaciteteve me çka do të ishim më të fortë me prezencën tonë në tregun vendor, si dhe në fuqizimin e prezencës së produkteve kosovare në tregjet e bashkësisë evropiane”, ka thënë Palushi.

Ndërkaq kryeministri i Kosovës, Isa Mustafa ka thënë se shembulli i kompanisë “Frutex” është një shembull i një kompanie të suksesshme e cila ka depërtuar fuqishëm në tregjet ndërkombëtare.

“Mendoj se është një sukses shumë i madh, rezultat i punës i njerëzve që kanë sens biznesi”, ka thënë Mustafa.

Sipas tij, Kosova ka trende pozitive në rritjen e eksportit sidomos të pijeve dhe kjo do të ndikojë në afirmimin e produkteve kosovare jashtë vendit.

“Duhet të shfrytëzojmë maksimalisht edhe Marrëveshjen e Stabilizim Asociimit dhe hyrjen në fuqi më 1 prill në mënyrë që tregjet tona të futen në një treg prej 500 milionë banorësh”, ka bërë thirrje Mustafa. /Telegrafi/