Friedrich Merz i CDU-së zbulon planet për një fond të ri prej 500 miliardë eurosh për infrastrukturën dhe mbrojtjen

Kreu i CDU-së Friedrich Merz ka zbuluar planet për një fond të ri të posaçëm prej 500 miliardë eurosh që synon rritjen e shpenzimeve për infrastrukturën dhe mbrojtjen.

Pak më shumë se një javë pas fitores së tij në zgjedhjet federale, Merz njoftoi se Unioni i tij Demokristian (CDU), së bashku me partinë e tij motër bavareze (CSU) dhe partnerin e mundshëm të koalicionit, Social Demokratët (SPD), do të paraqesin një projekt-ligj të përbashkët në parlament javën e ardhshme për të lehtësuar frenimin e borxhit të vendit, përcjell Telegrafi.

“Dua të them se shumë qartë, duke pasur parasysh kërcënimet ndaj lirisë dhe paqes sonë në kontinentin tonë, mbrojtja jonë tani duhet të bëjë ‘çfarëdo që të duhet’”, tha Merz, duke folur së bashku me liderët e partisë SPD dhe CSU në një konferencë shtypi në Berlin të martën.

“Shpenzimet shtesë për mbrojtjen mund të përballohen vetëm nëse ekonomia jonë kthehet në një rritje të qëndrueshme brenda një periudhe shumë të shkurtër kohore… Kjo kërkon investime të shpejta dhe të qëndrueshme në infrastrukturën tonë”, shtoi ai.

Sipas mediave të huaja, projektligjet kanë nevojë për një shumicë prej dy të tretash në parlament për t’u miratuar, që do të thotë se Merz duhet të rimbledhë Bundestagun në largim, të zgjedhur në vitin 2021, dhe të fitojë mbështetjen e të Gjelbërve. /Telegrafi/