Fonseca i kënaqur me Romën, por nuk mendon shumë për renditjen

Roma ka vazhduar me rezultate pozitive në Serie A, teksa ka mposhtur Parman me rezultat 3-0.

Giallorosët janë të pamposhtur në fushë, edhe pse në xhiron e parë e humben ndeshjen 3-0 nga Verona në tavolinë.

Edhe pse askush nuk e priste një Romë të tillë, kryeqytetasit kanë shkëlqyer me rezultate të mira dhe ndeshje të bukura për sy.

I lumtur me paraqitjen e ekipit ndaj Parmës ka mbetur edhe trajneri portugez i Romës, Paulo Fonseca.

“Ne luajtëm një ndeshje të shkëlqyeshme. Ne shënuam tre gola në pjesën e parë, por ne mund të shënonim më shumë. Ne luajtëm një lojë me momente të shkëlqyera, në pjesën e dytë krijuam situata të tjera shënimi”, tha Fonseca.

“Thjesht jam i përqendruar në ndeshje, jam i kënaqur sepse ekipi po luan mirë dhe po fiton. Gjëja më e rëndësishme është të fitojmë dhe të bëjmë këto shfaqje në fushë”, tha Fonesca.

Henrikh Mkhitaryan ka vazhduar shkëlqimin, teksa ka shënuar dy gola të tjerë në këtë takim.

“Mkhitaryan është një profesionist i shkëlqyeshëm, inteligjent, i cili mund të luajë në role të ndryshme dhe me një qëndrim që është një shembull. Kam pasur gjithmonë besim në të”.

Tutje trajneri portugez ka folur edhe për renditjen në kampionatin italian, ku skuadra e tij për momentin është e treta me 17 pikë të grumbulluara.

“Ajo që është e rëndësishme është që unë jam i kënaqur me paraqitjen e ekipit, ne duhet të rritemi, të shohim që ekipi ka besim dhe ne duhet të mendojmë vetëm për ndeshjen tjetër. Nuk dua të mendoj për renditjen”, përfundoi Fonseca. /Telegrafi/