Flamur Kasami është duke përfaqësuar Kosovën në Konkursin Ndërkombëtar të Kuranit, që po zhvillohet në Malajzi.
Përmes një postimi në Facebook, Kasami ka thënë se është shumë i privilegjuar dhe mirënjohës që përfaqëson Kosovën, gjegjësisht Bashkësinë Islame të Kosovës në një ndër garat më të mëdha botërore të Kuranit në Kuala Lumpur të Malajzisë.
Përndryshe, Dr. Flamur Kasami ka bërë të ditur për Telegrafin se do të jetë pjesë e garës për "bukur-lexim" më të mirë, ku do të jenë edhe 52 garues të tjerë nga vende të ndryshme të botës.
Siç bëhet e ditur, garuesit nga 71 vende të botës, 53 prej tyre janë pjesëmarrës në garën për "bukur-lexim" të Kuranit dhe 39 të tjerë janë pjesëmarrës “memorizues” të Kuranit – duke garuar në kategoritë e tyre përkatëse.
Ceremonia e hapjes së garës - që zhvillohet nga 5 deri më 12 tetor - u mbajt në Qendrën Botërore të Tregtisë në Kuala Lumpur me pjesëmarrjen e garuesve, zyrtarëve malajzianë dhe jo vetëm.
Ajo përfshinte një recital nga recituesi pesë herë kampion malajzian Rahmas Abdullah.
Ngjarja organizohet çdo vit në kryeqytetin e vendit, Kuala Lumpur nga Departamenti i Zhvillimit Islamik të vendit (JAKIM).
Ndërsa duke iu drejtuar ceremonisë së hapjes, kryeministri malajzian Anwar Ibrahim theksoi rëndësinë e unitetit dhe mençurisë.
"Mendimi mendjengushtë do të na fundosë. Në të njëjtën kohë, të menduarit e nxituar dhe jo i mençur do të bëhet një sfidë për ne", citohet të ketë thënë ai.
Ai theksoi nevojën për mirëkuptim, durim dhe mençuri në vendimmarrje, veçanërisht në dritën e luftës së vazhdueshme në Gaza. /Telegrafi/
