Ferizaj, ​27 vjet burgimi dhe 5 mijë euro gjobë ndaj katër personave për grabitje

Gjykata Themelore në Ferizaj ka shpallur aktgjykim dënues ndaj të pandehurve Xh.S., Sh.R., M.B., dhe F.G., të cilët janë shpallur fajtorë për veprën penale të grabitjes dhe vepra të tjera të ndërlidhura.

Sipas aktgjykimit, i pandehuri Xh.S. është shpallur fajtor për grabitje në bashkëkryerje, mbajtje në pronësi, kontroll ose posedim të paautorizuar të armëve, si dhe për lëndim të lehtë trupor në bashkëkryerje. Për këtë, ai është dënuar me 10 vjet burg dhe gjobë prej 3,000 eurosh.

I pandehuri Sh.R. është dënuar për grabitje në bashkëkryerje dhe i është shqiptuar 8 vjet burg dhe gjobë prej 1,000 eurosh.

Ndërsa, M.B. është dënuar për grabitje në bashkëkryerje dhe lëndim të lehtë trupor, me 6 vjet burg dhe gjobë prej 500 eurosh.

F.G. është shpallur fajtor për ndihmë në kryerjen e grabitjes dhe është dënuar me 3 vjet burg dhe gjobë prej 500 eurosh.

Gjykata ka urdhëruar që të pandehurve Xh.S., Sh.R., dhe M.B. t’u vazhdohet masa e paraburgimit deri në hyrjen në fuqi të aktgjykimit, por jo më gjatë se koha e dënimit të shqiptuar.

Po ashtu, për të pandehurit Xh.S. dhe M.B., për veprën penale të grabitjes në bashkëkryerje, si dhe për B.K. dhe A.B., për veprën penale të dhënies së ndihmës pas kryerjes së veprave penale, prokurori i shtetit është tërhequr nga ndjekja penale, duke çuar në refuzimin e akuzës ndaj tyre.

Palët kanë të drejtë ankese ndaj këtij aktgjykimi brenda 30 ditëve nga dita e pranimit të tij me shkrim, duke e adresuar ankesën në Gjykatën e Apelit në Prishtinë përmes Gjykatës Themelore në Ferizaj./Telegrafi/