Është nën kontratë me Bayernin, por Nubel refuzon të rikthehet në Munich përkundër insistimit nga klubi gjerman

Bayern Munich është në kërkim të një portieri pas lëndimit të rëndë të Manuel Neuer.

Kapiteni i rekordmenëve gjermanë pësoi një lëndim duke skijuar dhe ka mbyllur sezonin, pasi nuk pritet të rikthehet deri në qershor.

Bavarezët janë futur në tregun e transferimeve pasi kanë nevojë të nënshkruajnë me një portier cilësorë, por deri më tani nuk kanë zyrtarizuar ende.

Ideja e parë në kampin bavarez ishte ta rikthenin të huazuarin te Monaco, Alexander Nubel, por kanë hasur në një refuzim nga portieri i tyre.

26-vjeçari në një prononcim për Bild ka thënë se nuk do të rikthehet në Allianz Arena, pasi në momentin që Neuer rikthehet nga lëndimi ai do të startojë sërish nga minuta e parë.

“Nuk ka kuptim të kthehem sërish në Munich. Neuer e ka diktuar se mbetet numri një dhe nga fundi i sezonit me shumë mundësi do të jetë gati, çka nënkupton se nuk ka sens të jemi aty”.

“Kur kalova te Monaco arrita të kuptoj se këtu më vlerësojnë dhe më bëjnë të ndihem i rëndësishëm. Besoj se ky është përjetimi më i mirë i një futbollisti”.

“Krijimi i besimit nga të dyja palët rrit marrëdhënie të shëndoshë, në Gjermani më mungoi dhe nuk më jep shpresa për t’u ndodhur sërish aty. Nëse Bayerni do të dëshironte vërtet shërbimet e mia do të më kontaktonte në një fazë optimale, jo vetëm kur nuk ka më zgjedhje tjetër”.

“Është e vërtetë se të luash me bavarezët është kulmi i karrierës futbollistike, ama të jesh në pozitën e titullarit, jo të luash si zëvendësues”, tha portieri gjerman për Bild.

Nubel iu bashkua Bayernit në verën e vitit 2020 nga Schalke 04 si lojtar i lirë, derisa që nga viti 2021 është i huazuar te Monaco ku po shkëlqen me paraqitjet e tij. /Telegrafi/