Endrick do të luajë ndeshjen e tij të parë në “Santiago Bernabeu” shumë më shpejt nga sa e prisnit

Real Madridi e ka siguruar blerjen e sensacionit brazilian Endrick për më shumë se një vit më parë, saktësisht në dhjetor të 2022.

Sidoqoftë, ylli i Palmeiras duhej të qëndronte në Brazil edhe për një vit e gjysmë deri sa të mbush 18 vjet në korrik, kjo për shkak se lojtarët nën moshën 18-vjeçare nuk lejohet që të transferohen në Evropën.

Ani pse na ndajnë katër muaj para se ai zyrtarisht të bëhet pjesë e gjigantit spanjoll, Endrick pritet që të luajë ndeshjen e tij të parë në “Santiago Bernabeu” shumë më shpejt se sa e prisnit.

Endrick është ftuar nga kombëtarja e Brazilit dhe pritet të luajë në miqësoren ndaj Spanjës më datë 26 mars e cila do të luhet në stadiumin ikonik “Santiago Bernabeu”.

Përveç Endrick të ftuar gjithashtu janë edhe dyshja Vinicius dhe Rodrygo, andaj nuk përjashtohet mundësia që treshja e Real Madridit ta nisin së bashku nga minuta e parë këtë ndeshje.

Endrick këtë sezon deri më tani është paraqitur në 31 ndeshje në kampionatin brazilian, ku ka shënuar 11 gola./Telegrafi/