Endri Çekiçi ka luajtur si zëvendësues për Shqipërinë në ndeshjen ndaj Hungarisë

Kuqezinjtë morën tri pikë të arta nga kjo përballje, ku mesfushori shqiptar bëri paraqitje shumë të mirë.

Por Çekiçi kërkon më shumë minuta nga Edoardo Reja pas paraqitjes së mirë që bëri ndaj Hungarisë, teksa në konferencën për shtyp në pragë të sfidës ndaj San Marinos deklaroi me bindje se Shqipëria do të ketë një ardhme të ndritur.

“Në pjesën e parë kemi bërë ndeshje të mirë edhe me Poloninë. Na tha trajneri në pushim dje që mos bënim të njëjtat gabime se mund të na përsëriteshin të njëjtat gabime. Besoj se kemi një grup me lojtarë të talentuar, besoj se në vitet e ardhshme do kemi ekip kompetitiv jo vetëm në rajon por edhe në botë”, tha Çekiçi.

Tutje mesfushori i Konyaspor ka folur edhe për minutat që po ka në dispozicion te Kombëtarja e Shqipërisë.

“Natyrisht që çdo lojtar do të luaj, e rëndësishme është që të jesh pjesë e grupit, vjen gradualisht, edhe nëse nuk luaj do bëj maksimumin. Vij këtu për fanellën. Nuk na vendos në trysni kundërshtari sepse e dimë çfarë cilësish kemi, besojmë te lojtarët dhe mund të arrijmë vendin e dytë në grup. Ka shumë lojtarë të rinj dhe këtu do e shohim njëri-tjetrin për shumë vite. Në ndeshjet në vazhdim hap pas hapi loja do vijë duke u përmirësuar”, vazhdoi tutje mesfushori.

Ai foli edhe për një goleadë të mundshme të Shqipërisë në ndeshjen e së mërkurës ndaj San Marinos.

“Do ishte ekstra, por në fillim tri pikët kanë vlerë. Besoj se kemi ndryshuar stilin e lojës, jemi më ofensivë, do hyjmë për të shënuar”, tha Çekiçi. /Telegrafi/