Edhe policia e Tetovës me kamera

Edhe Policia e Tetovës shumë shpejt do të promovojë projektin “Sistemi mobil për xhirim me kamera”, që do të shfrytëzohet për realizimin e disa qëllimeve. Në mesin e këtyre qëllimeve është edhe dokumentimi i veprimeve të pjesëtarëve të policisë kur ndërmerren veprime zyrtare, të sigurojë ligjshmëri në veprimin e pjesëtarëve të policisë, të evitojë lëshimet në punën e pjesëtarëve të policisë përmes shfrytëzimit të materialit të xhiruar për analizë, trajnim dhe avancim të veprimtarisë policore, ka bërë të ditur Televizioni Koha, transmeton Telegrafi Maqedoni.

Po ashtu në mesin e këtyre qëllimeve është edhe kontrollimi i punës së pjesëtarëve të policorë nga ana e eprorëve të tyre, preventive për keqpërdorime dhe korrupsion, si dhe vërtetimin e bazuar të  ankesës së qytetarëve.

“Para se të fillojë në praktikë ky aktivitet, planifikohet trajnim adekuat për pjesëtarët e policisë, të cilët do ta shfrytëzojnë këtë sistem për xhirim, në kuadër të së cilit do të njihen me procedurën për bartjen e materialit të xhiruar, shqyrtimin dhe ruajtjen e të njëjtit. Kjo metodë e re e punë së policisë me kamera, pritet që të mundësojë përmirësim të shkallës së bazës të veprimit të ndërmarrë nga ana e policisë, me qëllim që në mënyrë ligjore të zbatohen përgjegjësitë që kanë ata, kanë thënë nga policia e Tetovës./Telegrafi/