E dërguan për të fituar minuta, por talenti i Realit nuk po ka hapësira te Dortmund – madrilenët mendojnë rikthimin e tij në La Liga

Real Madridi kishte shpenzuar 30 milionë euro për ta blerë mesfushorin brazilian Reinier nga Flamengo.

Los Blancos e blenë lojtarin në janar, por e lanë në huazim tek skuadra braziliane deri në verën e këtij viti.

Kampioni në fuqi i Spanjës vendosi ta huazojë atë për dy sezone te Borussia Dortmund në mënyrë që lojtari të fitojë sa më shumë minuta dhe përvojë.

Por kur kanë kaluar katër muaj që Reiner i është bashkuar Dortmundit, në Madrid janë të acaruar me klubin gjerman.

Mesfushori i talentuar brazilian nuk është duke pasur fare minuta te BVB dhe kjo gjë nuk po i pëlqen madrilenëve.

18-vjeçari ka luajtur në shtatë takime gjithsej, por në asnjërën nuk ka qenë titullar, ku ka vetëm 105 minuta në total në fushë.

Marca ka raportuar se Los Blancos po monitorojnë situatën e lojtarit të tyre dhe shpresojnë që ai sa më shpejt të fillojë të luaj më shumë te Dortmund.

Nëse vazhdon e njëjta situatë, atëherë Real Madrid mund ta shkëpusë kontratën e huazimit me Dortmundin dhe ta rikthejë Reinerin në kryeqytetin spanjoll.

34 herë kampioni i Spanjës do të shikojë ndonjë tjetër skuadër për ta huazuar lojtarin në mënyrë që ai të luaj rregullisht. /Telegrafi/