Drejtorit të arrestuar të KEK-ut i përkeqësohet gjendja shëndetësore, i refuzohet dërgimi në QKUK

Kryeshefit Ekzekutiv të Korporatës Energjetike të Kosovës (KEK), Nagip Krasniqit, i cili është arrestuar sot nën dyshimin për kryerjen e tri veprave penale, i është përkeqësuar gjendja shëndetësore. I njëjti me urdhër të prokurorit është dërguar në mbajtje prej 48 orësh. 

Avokati i Krasniqit, Taulant Ferizi tha për Telegrafin se klientit të tij i është refuzuar kërkesa për dërgimin e klientit të tij për trajtim shëndetësor në Qendrën Klinike Universitare të Kosovës(QKUK).

“Nagip Krasniqi aktualisht është në mbajtje, pavarësisht se gjendja e tij shëndetësore është përkeqësuar sërish. Kërkesa e mbrojtjes për dërgim në QKUK është refuzuar me arsyetimin se i njëjti ka qëndruar sot njëherë gjatë ditës në QKUK për trajtim. Ne do të shfrytëzojmë të drejtën e ankesës ndaj këtij vendimi siç e parasheh ligji”, ka deklaruar Ferizi.

Ferizi tha se nuk është thyer dera e banesës se klientit të tij, dhe se e njëjta është çelur bashkë me Policinë gjatë procedurave hetimore.

Prokuroria Speciale e Kosovës ka njoftuar se më 19 prill është arrestuar Nagip Krasniqi, nën dyshimet për tri vepra penale.

Lexo po ashtu Arrestohet Nagip Krasniqi - kryeshef ekzekutiv i KEK-ut

I arrestuari dyshohet për veprat penale: Keqpërdorimi i pozitës apo autoritetit zyrtar, ushtrim i ndikimit dhe konflikt interesi.

Prokuroria Speciale tha se gjatë aksionit të zhvilluar të mërkurën është bastisur zyra e të dyshuarit në Prishtinë, dy banesa në kryeqytetin e Kosovës që ishin në pronësi të tij, me qëllim që të gjenden dëshmi “që kanë të bëjnë me veprat penale të lartcekura”.

“Gjatë bastisjes janë sekuestruar dokumente të ndryshme që ndërlidhen me rastin, pajisje elektronike si tre kompjuterë, një llap-top, një celular, një USB, në cilësi të provave materiale që do të shërbejnë për procedurën e mëtejme”, u tha në njoftim.

Drejtori i KEK-ut është dërguar në mbajtje prej 48 orësh.

Arrestimi i drejtorit të KEK-ut, Nagip Krasniqi, ka nxitur reagime nga drejtuesit e subjekteve politike opozitare.

Krerët e partive opozitare, PDK, LDK dhe AAK, kanë thënë se kjo është dëshmi e abuzimit të Qeverisë në sektorin e energjisë./Telegrafi/