​Ditën e inaugurimit të Trump, “Miqtë e Amerikës” vendosin flamurin e ri te shtatorja e presidentit Bill Clinton

Shoqata “Miqtë e Amerikës”, për nder të inaugurimit të Presidentit të Shteteve të Bashkuara të Amerikës, Donald Trump, te shtatorja e Presidentit Bill Clinton kanë zëvendësuar flamurin e mëparshëm me një flamur të ri.

Me ç’rast kryetari i kësaj shoqate Agim Rexhepi, ka theksuar se përmes këtij aktiviteti respektohet populli aleat dhe mik amerikan.

Rexhepi ka thënë ky veprim ka për qëllim të dërgojë mesazh se populli i Kosovës di të respektojë aleatët, Shtetet e Bashkuara të Amerikës, dhe di të vlerësojë veprimet që ka bërë ShBA-ja kundrejt popullit shqiptar.

“Shfrytëzoj rastin që t’iu uroj SHBA-së pari kryerjen në mënyrë perfekte të zgjedhjeve të tyre nacionale pa turbulenca. Elementi tjetër që dua ta potencoj është që ta përgëzoj partinë republikane për fitoren e arritur, njëkohësisht ta përgëzoj presidentin Trump për fitoren edhe për inaugurimin që do ta bëjë sot. Me veprimin e bërë ne respektojmë SHBA-të, respektojmë flamurin amerikan, respektojmë institucionin e presidentit të SHBA-ve si dhe popullin aleat dhe mik amerikan.

Veprimi jonë ka për qëllim që të dërgoj mesazh që ne populli i Kosovës, në veçanti populli shqiptar di të respektojë aleatët, di të respektojë SHBA-të, dimë të vlerësojmë veprimet e bërë jo vetëm gjatë kohës se fundit por gjatë historisë që kanë bërë për Kosovën e Shqipërinë… Shpresoj që presidenti Trump do ta vazhdoj politiken e gjithë atyre presidenteve të SHBA-ve pavarësisht a kanë qenë demokrat apo republikan, pro interesave të popullit shqiptar. Shpresoj që Presidenti Trump do ta vazhdoj veprimin e jashtëzakonshme politik sa ishte president nga e kaluara ku nëpërmjet tij arritëm ta sigurojmë një njohje të jashtëzakonshëm, që ishte Izraeli”, tha ai.

Në anën tjetër, prezent në këtë ngjarje ishin edhe zjarrfikësit. Zëvendëskomandanti Abdusamed Shkodra, u shpreh se të njëjtit morën pjesë në ndërrimin e flamurit si shenje mirënjohje për Amerikën.

“Zjarrfikësit morën pjesë në ndërrimin e flamurit. Kjo është si shenjë mirënjohje për Amerikën se çka ka bërë për popullin shqiptar, në ditën e inaugurimit të presidentin të ri”, tha ai.

Dita e inaugurimit të Donald Trump do të nisë me një shërbim në Kishën e Shën Gjonit, në sheshin Lafayette, një kishë historike në Uashington DC, e ndjekur nga çaji në Shtëpinë e Bardhë.

Donald Trump fitoi zgjedhjet presidenciale të 5 nëntorit ku në garë ishte me zëvendëspresidenten demokrate Kamala Harris. /kp/