Ministrat e Jashtëm të Japonisë, SHBA-së, Australisë dhe Indisë zhvillojnë bisedime në Tokio për të dënuar veprimet e rrezikshme të Kinës

Diplomatë të lartë nga Japonia, SHBA-ja, Australia dhe India janë takuar për të diskutuar shqetësimet e sigurisë dhe mbështetjen e përbashkët, si dhe për të përforcuar sigurinë detare dhe sigurinë kibernetike në rajonin Indo-Paqësor, mes tensioneve në rritje me Kinën.

Në një takim të organizuar në Tokio nga Ministrja e Jashtme japoneze, Yoko Kamikawa, Sekretari amerikan i Shtetit, Antony Blinken, Ministrja e Jashtme Australiane, Penny Wong, dhe Ministri i Punëve të Jashtme të Indisë, Subrahmayam Jaishankar, pritej të ndanin kundërshtimin e fortë ndaj rritjes së Pekinit në Detin e Kinës Jugore.

Mbështetja e përbashkët për të përforcuar sigurinë detare dhe sigurinë kibernetike në rajonin Indo-Paqësor ishte gjithashtu në axhendën e takimit.

Kjo pasi Kina ka shkaktuar tension në rritje me pretendimet e saj gjithëpërfshirëse mbi Detin e Kinës Jugore dhe rrugët e saj të rëndësishme tregtare detare.

Ajo gjithashtu e konsideron Tajvanin vetëqeverisës si territorin e saj, shkruan euronews, përcjell Telegrafi.

Në atë që është quajtur si “Bisedimet Quad”, katër ministrat nga vendet që përbëjnë superfuqitë globale në vetvete pritej të diskutonin bashkëpunimin se si të ruanin sigurinë e tyre.

Kamikawa tha në deklaratën e saj se siguria detare në rajon është gjithnjë e më e paqëndrueshme, kështu që uniteti dhe bashkëpunimi nevojiten më shumë se kurrë midis vendeve.

Wong e Australisë tha se ata po përballen me “rrethanat më konfrontuese në rajon në dekada”.

Bisedimet pritej të përfshinin edhe luftën e Rusisë në Ukrainë, konfliktin në Lindjen e Mesme dhe shqetësime të tjera të përbashkëta.

Ndryshe, bisedimet erdhën pasi Japonia dhe SHBA-ja mbajtën takimin e tyre të sigurisë “2+2”, ku ata e quajtën Kinën “sfida më e madhe strategjike”.

Vendet ranë dakord për thellimin e mëtejshëm të bashkëpunimit ushtarak duke bërë përmirësime të mëdha në strukturat e tyre komanduese dhe duke forcuar prodhimin dhe riparimin japonez të armëve të licencuara nga SHBA-ja. /Telegrafi/