Deshi ta heq qafe ish-burrin, gjeti ueb-faqen për angazhimin e “vrasësve profesionistë” – amerikania dha ofertën dhe tani e po e pret burgimi prej nëntë viteve

Një grua në Michigan të SHBA-ve, është deklaruar fajtore lidhur me vrasjen e ish-bashkëshortit dhe ky rast u zbardh falë një ueb-faqeje të rrejshme satirike e quajtur “Rent-A-Hitman” (ku angazhohet vrasësi profesionist), dhe tani mund të dënohet me burgim deri në nëntë vite.

52-vjeçarja, Wendy Lin Wayne nga Rockfordi, përdori ueb-faqen e rrejshme “Rent-A-Hitman”, duke tentuar të porosit vrasjen e ish-bashkëshortit gjatë 17 korrikut të vitit të kaluar, thuhet në kumtesën e policisë së Michigan, transmeton Telegrafi.

Wayne kontaktoi ueb-faqen, që pretendon se ofron vrasës profesionist që “zgjidhin probleme” nën emrin e rrejshëm, por ajo dha informacione të vërteta në fund të “kërkesës së saj”, gjë që detyroi pronaren e faqes të kontaktojë policinë, thuhet ndër tjera në kumtesë.

Pronarja e ueb-faqes filloi të brengoset që Wayne ndoshta po tenton të vret ish-bashkëshortin, që e cilësonte si fajtor për shumë probleme të saj.

Aty më pas filluan hetimet nga policia, ku polici që u prezantua si vrasës u takua më Wayne në qytetin ku ajo u lind dhe rrit.

Pas takimit, Wayne i ofroi 5.000 dollarë për vrasjen e ish-bashkëshortit që jeton në shtetin tjetër – duke ia dhënë “kaparen” prej 200 dollarëve për të mbuluar shpenzimet gjatë rrugëtimit.

Wayne i dha detektivit adresën e ish-bashkëshortit, por edhe adresën e vendit ku ai punon, shkruan Fox 2 Detroit.

Më 21 korrik të vitit të kaluar, Wayne u akuzua për kontraktim të vrasjes dhe përdorim të kundërligjshëm të kompjuterit për të kryer një krim, thuhet në raportin e policisë.

Të premten ajo pranoi fajin dhe sërish pritet të shfaqet në bankën e të akuzuarve. E mediat lokale raportojnë se kjo do të ndodhë gjatë 13 janarit të vitit të ardhshëm.

Nga lansimi i ueb-faqes së rrejshme në vitin 2005, pronarja u tha hetuesve se shumë persona e kanë kontaktuar duke kërkuar vrasës profesionist për t’ju kryer “shërbime” të ndryshme siç janë të shtënat në shkollë e deri te rrëmbimi i foshnjave.

Ajo pretendon se ueb-faqja ka arritur të parandalojë mbi 130 vrasje, pasi të gjitha kërkesat e klientëve i janë adresuar policisë. /Telegrafi/