Den Donçev, kreu i Fondit shëndetësor të Maqedonisë flet për importin e ilaçeve të falsifikuara

Policia e Turqisë që para dy vitesh ka paralajmëruar për kapacitete të fshehura në Turqi që prodhojnë ilaçe për tregun e Maqedonisë. Këto ilaçe, të prodhuara nga burime të dyshimta, ndërsa të paketuara në pako me emra origjinale, arrijnë në Maqedoni nëpërmjet të ashtuquajturit importi paralel. Çka është edhe më e frikshme, hyjnë pa asnjë certifikatë për cilësi pasi që rregullimi ligjor është shfuqizuar në vitin 2013.

Këto deklarata në lidhje me importin paralel të ilaçeve i jep drejtori i Fondit për shëndetësi, Den Donçev, në intervistën ekskluzive për “Fokus”. Ai pjesërisht zbulon edhe atë se kush ka përfituar më së shumti nga vendosja e importit paralel, duke thënë:”Tre ndërmarrje që kontrollojnë më shumë se 50 për qind të tregut të importit paralel janë në lidhje të drejtpërdrejtë familjare me ish-kryeministrin e Maqedonisë, Nikolla Gruevski”.

Donçev poashtu flet edhe për pesë çështje strategjike të sistemit të rrënuar të shëndetësisë, për absurditetin e listës pozitive të ilaçeve, sistemin e decentralizuar për furnizim dhe për faktin që shteti për disa pacientë është nënë, ndërsa për të tjerët njerkë./Telegrafi/