Çmimet dhe lojtarët që dëshiron t’i shesë Reali për ta financuar blerjen e Pogbas

Real Madridi akoma po shpreson se mund të bëjë edhe një transferim të madh në afatin kalimtar veror. Mirëpo, Los Blancos nuk mund ta transferojnë Paul Pogban nga Manchester Unitedi nëse nuk i grumbullojnë paratë e nevojshme për blerjen e tij.

Mesfushori francez mund të kushtojë deri në 180 milionë euro, ndërsa më poshtë jua sjellim futbollistët që Reali planifikon t’i shesë për të siguruar paratë për blerjen e tij:

Gareth Bale – 80 milionë euro

Madridi kishte besuar se klubet angleze do të shpenzonin për anësorin uellsian, i cili nuk bën pjesë në planet e Zinedine Zidane. Mirëpo, klubet kryesore hezitojnë ta paguajnë çmimin e madh për të dhe pagën e tij të lartë. Për këtë arsye, Los Blancos po tentojnë ta përfshijnë atë në marrëveshjen për transferimin e Pogbas nga Djajtë e Kuq.

Lexo po ashtu Reali duhet ta thyejë rekordin e transferimeve në Spanjë për ta blerë Pogban

James Rodriguez – 40 milionë euro

Kolumbiani qëndroi për dy vite i huazuar te Bayern Munichu, mirëpo klubi gjerman vendosi që të mos e blejë. Për këtë arsye, Reali është në kërkim të një blerësi, ndërsa Carlo Ancelotti ia ka hapur derën te Napoli, edhe pse klubi italian më shumë do ta dëshironte huazimin e tij.

Isco – 80 milionë euro

Mesfushori spanjoll, i cili kërkohet nga Manchester City, është ndër lojtarët prej të cilëve Reali dëshiron të përfitojë para. Mirëpo, shuma e parave që kërkojnë Los Blancos për të, nuk po pranohet nga klubet e interesuara për të. /Telegrafi/