Carovska: Shkollat janë të përgatitura për të gjithë skenarët, mësimi me prezencë fizike është në interes të nxënësve

Ministrja e Arsimit dhe Shkencës, Mila Carovska deklaroi se shkollat janë të përgatitura për skenarët për mësim që duhet të zbatohen në vitin shkollor 2021/2022, ndërsa vendimi për fillim me prezencë fizike është në interes të qytetarëve për shkak se mësimi me prani fizike nuk ka zëvendësim, jo vetëm për arsye të procesit të mësimit dhe socializimit, por edhe për shkak të shëndetit mendor.

“Të gjithë ne jemi prindër dhe të gjithë ishim dëshmitarë se fëmijët tanë mësonin vitin e kaluar, por ishim dëshmitarë se u mungojnë shokët, ju mungojnë mësueset dhe pikërisht këtë gëzim e kthejmë te fëmijët. E kthejmë edhe gëzimin e mësimdhënësve për shkak se ata nuk janë të plotë kur nuk janë në klasë, kur nuk janë me nxënësit të tyre”, tha Carovska.

Ajo uroi vitin e ri mësimor dhe bëri thirrje që në përpikëri të respektohen protokollet.

“Mësimi me prani fizike është sfidë në kohë pandemie, por vitin e kaluar si shtet, si Qeveri, si ministri, si komuna, dëshmuam se mund dhe dimë të respektojmë protokolle dhe nuk kishte asnjë rast të bartjes interne. Unë pres që edhe sivjet të jetë kështu. Numrat do të bien dhe do të rriten, është kohë pandemie dhe të gjithë jemi këtu jo sepse e duam, por se është e nevojshme, por procesi mësimor duhet të vazhdojë edhe në kohë pandemia”, tha mes tjerash Carovska./Telegrafi/