BDI për Ligjin për gjuhët: 11 dhjetori është dita që mund të ndryshojë gjithçka, nuk kemi përgjegjësi për pasojat

BDI në një kumtesë për media thotë se 11 dhjetori, dita kur Gjykata Kushtetuese do të mbajë seancë për vlerësimin e kushtetutshmërisë për Ligjin e gjuhëve, është dita që mund të ndryshojë gjithçka. Nga BDI madje thonë se nuk do të mbajnë përgjegjësi për pasojat e mundshme.

“Gjykata Kushtetuese e Maqedonisë së Veriut ka vendosur që më 11 dhjetor të marrë në shqyrtim kushtetutshmërinë e Ligjit për Përdorimin e Gjuhëve – një nga shtyllat kryesore të Marrëveshjes Paqësore të Ohrit dhe të bashkëjetesës ndëretnike. Çdo përpjekje për të shfuqizuar cilëndo dispozitë të këtij ligji nuk është thjesht një veprim juridik, por është një goditje e drejtpërdrejtë ndaj stabilitetit dhe paqes që ky vend ka ndërtuar me shumë sakrifica”.

“Për më tepër, gjyqtarët e Gjykatës Kushtetuese të përkatësisë etnike shqiptare kanë deklaruar publikisht se do të bojkotojnë këtë seancë dhe vendimmarrje, duke e bërë edhe më të rrezikshme një vendim të njëanshëm për të shfuqizuar dispozitat e Ligjit për Gjuhët. Ky bojkot është një tregues i fortë se këto përpjekje për të goditur 10 nene të këtij ligji kanë natyrë thellësisht diskriminuese dhe synojnë të “vrasin” gjuhën shqipe në mënyrë institucionale”.

Lexo po ashtu VLEN: Nisma për kontestimin e dygjuhësisë është tentim për grusht shteti

“Ky ligj është produkt i një kompromisi të ndërlikuar, i arritur pas viteve të mundimshme negociatash dhe është themeli i barazisë ndëretnike dhe respektit të ndërsjellë. Një vendim që do të cënonte këtë ligj do të përfaqësonte një shkelje të rëndë të Marrëveshjes së Ohrit dhe një kthim pas drejt një të ardhmeje të pasigurt dhe të trazuar”, thonë nga BDI.

“BDI e konsideron këtë moment si një pikë kritike, ku çdo veprim që synon të prishë këtë balancë delikate është kapërcim i Rubikonit. Nëse një herë që kjo vijë kalohet, nuk do të ketë më kthim pas! Nëse Gjykata Kushtetuese vendos të shkatërrojë arritjet e Marrëveshjes së Ohrit, pasojat do të jenë të parikuperueshme, dhe ne nuk mund të mbajmë përgjegjësi për atë që mund të pasojë”.

“U bëjmë thirrje qytetarëve, liderëve politikë dhe bashkësisë ndërkombëtare që të veprojnë menjëherë për të parandaluar këtë akt që rrezikon stabilitetin e vendit dhe të rajonit. Shqiptarët dhe të gjitha komunitetet që besojnë në drejtësi dhe barazi nuk mund të heshtin përballë këtij kërcënimi”, thonë prej atje.

Në fund thonë se ky nuk është një moment për të qëndruar indiferentë.

Gjykata Kushtetuese e RMV-së për më 11 dhjetor (e mërkurë) e ka caktuar seancën në të cilën duhet të vendosë për kushtetutshmërinë e Ligjit për përdorimin e gjuhëve, i cili rregullon përdorimin e gjuhës shqipe. Kjo iniciativë në Gjykatën Kushtetuese ka shkaktuar reagime të mëdha në opinionin në vend. Nga Koalicioni VLEN të cilët janë pjesë e pushtetit, thonë se kontestues janë tre nene të Ligjit për përdorimin e gjuhëve, që sipas tyre në Komisionin e Venecias i ka dërguar Qeveria në të cilën ka marrë pjesë edhe BDI.

Ndryshe, Ligji për përdorimin e gjuhëve është miratuar në vitin 2018, ndërsa edhe atëherë në atë seancë në Kuvend pati tensione të mëdha. /Telegrafi/

Lexo po ashtu Votohet Ligji për gjuhët në Maqedoni