Në Ministrinë e Industrisë, Ndërmarrësisë dhe Tregtisë sot njësia hetuese e Prokurorisë Speciale, me urdhër të prokurorit Valdet Gashi kanë kontrolluar zyrat e dy zyrtarëve të lartë të MINT-it, drejtorit të Departamentit për rezervat shtetërore, Hafiz Gara dhe drejtorit të Departamentit të integrimeve evropiane, Irfan Lipovica.

Sipas një njoftimi nga MINT bëhet e ditur se Prokuroria Speciale ka bërë njoftimet e nevojshme për këtë rast.

Po ashtu në njoftim thuhet se : “Ministria e Industrisë, Ndërmarrësisë dhe Tregtisë mirëpret çdo hetim për rastin e blerjes së rezervës shtetërore anipse ne jemi të bindur që furnizimet dhe rezerva shtetërore janë në përputhje ligjet, planin dhe asnjë dëm apo dëmtim nuk ka ndodhur me to.

Për këtë çështje prej një kohë të gjatë e veçanërisht në muajt e fundit ka përpjekje të mëdha që të keq informohet publiku në vendin tonë. Motivet dhe arsyet për këto veprime të nxitura dhe koordinuara nga palë të ndryshme të interesit duhet të jenë po ashtu pjesë e hetimit në këtë rast”.

Tutje, Ministria e Industrisë, Ndërmarrësisë dhe Tregtisë pret që organet e hetimit të kenë në vëmendje që krahas punës hetimore, të mos cenojnë në asnjë rrethanë sigurinë shtetërore, për sa kohë që bëhet fjalë për rezervën shtetërore të Republikës sonë, e klasifikuar sipas Ligjit për Rezervën Shtetërore dhe Ligjit për Mbrojtjen e Informacionit të Klasifikuar.

“Ministria e Industrisë, Ndërmarrësisë dhe Tregtisë, i lut mediat që të përmbahen nga deklarime të pakonfirmuara nga ministria dhe siguron se procesi i furnizimit me mallra për Rezervën Shtetërore, me standarde dhe parametra të përcaktuara të cilësisë, është trajtuar dhe monitoruar sipas legjislacionit në fuqi.

Ministria është e përkushtuar të vazhdojë me rritjen e Rezervës Shtetërore edhe në këtë vit, sipas Ligjit mbi Ndarjet Buxhetore për Buxhetin e Republikёs sё Kosovёs pёr vitin 2023, me qëllim që të sigurojë qytetarët që në rrethana të jashtëzakonshme të kenë përkrahjen shtetërore në tejkalimin e situatave eventuale të krizës”, thuhet ndër të tjera në njoftim. /Telegrafi/

Me urdhër të Prokurorisë Speciale të Republikës së Kosovës (PSRK), Policia e Kosovës – Njësia e Veçantë e Hetimeve, ka realizuar sot bastisje në lokacione të ndryshme në Prishtinë, ku kanë dy zyrtarë të Ministritë së Industrisë, Ndërmarrësisë dhe Tregtisë, drejtorin e Departamentit për Rezervat Shtetërore të Mallrave, Hafiz Gara, dhe drejtorin e Departamentit për Integrim Evropian dhe Koordinim të Politikave, ish-sekretarin Irfan Lipovica.

Gjatë ditës është arrestuar edhe Ridvan Muharremi, i cili dyshohet për “Dhënie të ndihmës në kryerjen e veprës penale të Keqpërdorimit të detyrës zyrtare”.

“Prokuroria Speciale njofton opinionin publik se tre personat e arrestuar, R.M. H.G dhe I.L. dyshohen për veprat ‘Keqpërdorim i detyrës zyrtare’, si dhe ‘Dhënie të ndihmës në kryerjen e veprës penale të Keqpërdorimit të detyrës zyrtare’”, thuhet në njoftim.

Ndërkaq, gjatë bastisjes janë siguruar dhe sekuestruar prova materiale të cilat do të përdoren për procedurë të mëtutjeshme hetimore, ndërkaq të njëjtit me urdhër të Prokurorit të Shtetit, do të dërgohen në mbajtje për 48 orë.

Deputetë të Partisë Demokratike të Kosovës, Lidhjes Demokratike të Kosovës dhe të Aleancës për Ardhmërinë e Kosovës kanë kërkuar sot shkarkimin e ministres Rozeta Hajdari pas arrestimit të dy zyrtarëve të Ministrisë së Industrisë, Tregtisë dhe Ndërmarrësisë.

Deputetja e Partisë Demokratike të Kosovës (PDK), Blerta Deliu-Kodra ka reaguar pas aksionit të Policisë së Kosovës, ndërsa kërkoi shkarkimin e ministres së MINT-it, Rozeta Hajdari.

“Nuk mund t’i iket përgjegjësisë politike në një skandal të madh si ky”, tha ajo.

Edhe deputeti i Lidhjes Demokratike të Kosovës, Besian Mustafa theksoi se arrestimet nuk mjaftojnë.

“Duhen hetime të thella të aktiviteteve dhe lidhjeve kriminale të zyrtarëve më të lartë të VV-së, të cilët kjo parti i mbron publikisht! Shihet qartazi që nuk është çështje individësh por është sistematike…”, tha ai.

Shefi i Grupit Parlamentar të AAK-së, Besnik Tahiri ka komentuar arrestimet e sotme lidhur me dyshimet për keqpërdorim të rezervave shtetërore, gjersa theksoi se sot do të duhej të shkarkohej ministrja Rozeta Hajdari.

“I kam dorëzuar të gjitha materialet, nuk dyshoj te klienti im”, për ta lexuar deklaratën e plotë të avokatit Muhamet Halimit kliko këtu.

Policia e Kosovës ka arrestuar Ridvan Muharremi, i dyshuar për keqpërdorime të rezervave shtetërore të Kosovës. Lexo lajmin e plotë për ma shumë detaje.

Policia e Kosovës sot në orët e mëngjesit është duke kryer një bastisje në Ministrinë e Industrisë dhe Tregtisë (MIINT) si dhe një shtëpi e restorant në Prishtinë.

Sipas burimeve të Telegrafit mësohet se bëhet fjalë për restorantin dhe shtëpinë e Ridvan Muharremit, në Prishtinë, e që raportohet se është person i afërt me Kurtin.

Lajmin e plotë lexoni këtu:

Policia e Kosovës ka hyrë edhe në zyrën e ministres Rozeta Hajdari, ndërsa ka shoqëruar në Polici drejtorin e Departamentit për Rezervat Shtetërore të Mallrave, Hafiz Gara, dhe drejtorin e Departamentit për Integrim Evropian dhe Koordinim të Politikave, ish-sekretarin Irfan Lipovica.