Mesfushori spanjoll, Oriol Romeu është duke kaluar nëpër një formë të mrekullueshme.
Në moshën 25-vjeçare, spanjolli ka shpërthyer dhe është në formën e tij më të mirë që nga fillimi i karrierës.
Katalunasi ka filluar hapat e parë në karrierë në ‘La Masia’, tek Barcelona, por asnjëherë nuk e bindi skuadrën dhe gjiganti spanjoll e shiti tek Chelsea për pesë milionë euro.
Mesfushori defensivë nuk ka mundur të gjejë hapësira të shumta as në Chelsea dhe është huazuar në Valencia dhe në Stuttgart.
Këtë vit, skuadra tjetër angleze Southampton besoi në të dhe pagoi shtatë milionë euro duke e transferuar.
E investimi i bërë si duket nuk i ka shkuar huq Southamptonit pasi lojtari është duke shkëlqyer.
Romeu është shpallur futbollisti më i mirë i muajit shtator dhe ka pasur paraqitje të jashtëzakonshme edhe në këtë muaj.
Forma më e mirë e shtatlartit është këtë edicion me Southamptonin, pasi ai nuk kishte shkëlqyer as tek Valencia dhe as në Bundesliga me Stuttgartin.
25-vjeçari ka luajtur në nivele të larta që disa vite por ai nuk ka qenë i grumbulluar asnjëherë me ekipin e parë të Spanjës, ndërsa sa i përket grupmoshave i ka kaluar të gjithat nga U15 deri në U23.
Ai tani pas formës së mirë që po kalon, ku ka luajtur në 12 takime këtë edicion shpreson në një ftesë nga ish-kampionët e botës dhe Evropës. /Telegrafi/
