Banorët e fshatit Bërnicë e Ulët ankohen se që nga shtatori po përballen me mungesë të ujit

Banorët e fshatit Bërnicë e Ulët po përballen me një situatë të vështirë dhe të vazhdueshme për shkak të mungesës së ujit të pijshëm që nga muaji shtator i vitit të kaluar.

Kjo situatë ka shqetësuar banorët e këtij fshati, të cilët kanë shprehur ankesat e tyre në redaksinë e Telegrafit, duke kërkuar zgjidhje për problemin e tyre.

Ata kanë njoftuar se furnizimi me ujë është ndërprerë çdo natë nga ora 21:00 deri në 01:00 pas mesnate.

Për më tepër, banorët e fshatit thonë se kanë marrë hapa për të raportuar problemin te Kompania Rajonale e Ujit “Prishtina”, por deri tani nuk kanë marrë asnjë reagim apo zgjidhje për këtë çështje. Ata janë shqetësuar që kërkesat e tyre nuk po merren parasysh, pavarësisht se situata ka zgjatur për një periudhë të gjatë.

Një tjetër problem që ka dalë si pasojë e mungesës së ujit është dhe vështirësia në menaxhimin e aktiviteteve të përditshme në shtëpi. Banorët po detyrohen që të kryejnë punët e amvisërisë gjatë ditës, kur edhe çmimi i energjisë elektrike është më i lartë, duke përballuar kështu një ngarkesë shtesë financiare.

Kjo situatë e vazhdueshme ka shkaktuar pakënaqësi të madhe mes qytetarëve të Bërnicës së Ulët, të cilët kërkojnë ndërhyrje urgjente nga organet përgjegjëse për të zgjidhur problemin e ujit dhe për të përmirësuar kushtet e jetesës për të gjithë banorët e fshatit.

Lidhur me rastin, Telegrafi ka kontaktuar edhe me KRU “Prishtina” por që deri tani nuk ka pranuar ndonjë përgjigje. /Telegrafi/