Ballkani fiton thellë ndaj Besës dhe bëhet lider i përkohshëm i Superligës

Ballkani ka shënuar fitore të thellë ndaj Besës së Pejës me rezultat 4-1 në ndeshjen e vlefshme për javën e 28-të në Superligën e Kosovës.

Ekipi i Bledi Shkëmbit ka marrë një fitore të lehtë në shtëpi ndaj Besës dhe është bërë lider i përkohshëm i kampionatit.

Pjesa e parë e ndeshjes u karakterizua me lojë më të mirë dhe dominim të vendasve, por të dy ekipet arritën ta shënojnë nga një gol.

Ballkani kaloi në epërsi në minutën e pestë me anë të Meriton Korenicës, i cili shënoi për 1-0, ndërsa Besa barazoi 1-1 me anë të Andi Qorrit (24’).

Vendasit patën mundësi ideale për të shënuar një tjetër gol, por në minutën e 42-të Arbër Hoxha humbi penalltinë dhe ekipet shkuan baras në pushim.

Në pjesën e dytë, Ballkani rriti sulmet dhe rastet e krijuara, ndërsa arriti t’i shënojë edhe tri gola për të marrë fitoren.

Goli i parë në këtë pjesë erdhi në minutën e 56-të me anë të Nazmi Gripshit, i cili shënoi për 2-1, ndërsa Korenica (69’) shënoi golin e dytë personal për 3-1.

Për golin e fundit dhe rezultatin përfundimtar u përkujdes mbrojtësi Arbër Prekazi që shënoi me kokë për 4-1.

Pas kësaj fitore, Ballkani e sheh veten në pozitën e parë me 58 pikë, po aq sa ka Drita e dyta me një ndeshje më pak, ndërsa Besa zë vendin e fundit me vetëm 10 pikë. /Telegrafi/