Aviokompania amerikane vazhdimisht regjistron gabimisht 101-vjeçaren si fëmijë

Një grua 101-vjeçare vazhdon të ngatërrohet me një fëmijë për shkak të një gabimi me sistemin e rezervimeve të një aviokompanie.

Problemi ndodh sepse sistemet e American Airlines me sa duket nuk mund të llogarisin që Patricia, e cila nuk donte të ndante mbiemrin e saj, ka lindur në vitin 1922 dhe jo në 2022.

BBC ishte dëshmitar i ngatërresës së fundit, për të cilën ajo dhe ekuipazhi i kabinës qeshën, transmeton Telegrafi.

“Ishte qesharake që ata mendonin se isha vetëm një fëmijë i vogël dhe unë jam një zonjë e moshuar”, ajo tha.

Por 101-vjeçarja thotë se do të dëshironte që defekti të rregullohej pasi i ka shkaktuar disa probleme në të kaluarën.

Për shembull, në një rast, stafi i aeroportit nuk kishte gati transportin për të brenda terminalit, pasi ata prisnin një fëmijë.

Defekti që dëshmoi BBC ndodhi kur Patricia po fluturonte midis Chicagos dhe Marquette, Michigan – një fluturim në të cilin po udhëtonte edhe ky reporter.

Ish-infermierja, e cila fluturon çdo vit për të parë familjen dhe për t’i shpëtuar dimrave të ftohtë, thotë se në të gjitha rastet stafi i American Airlines ishte i sjellshëm, pavarësisht nga konfuzioni. /Telegrafi/