Atletika nis stinorin e dytë pa gara në shteg

Federata Atletike e Kosovës (FAK) ka anuluar garën e parë për këtë vit, e planifikuar të mbahej të dielën.

Mitingun e parë të hapur FAK-u nuk do ta mbajë, pasi shtegu i vetëm i atletikës në Kosovë, që gjendet në stadiumin “Adem Jashari” në Mitrovicë, ende nuk është i gatshëm për gara.

Ky shteg është rinovuar, është shtruar komplet i ri, por nuk është bërë pranimi teknik i tij, pasi në disa pjesë të tartanit duhet të intervenohet, meqë puna nuk është bërë sipas standardeve.

Zyrtarë të FAK-ut, patën thënë se shtegu nuk është vijëzuar mirë dhe se në ca vende nuk ishte i drejtë, shkruan sot Koha Ditore.

Në fakt punët në shteg është dashur të përfundonin gjatë verës së vitit të shkuar (pas një viti punë), por afati i përfundimit të tyre ishte shtyrë dy herë. Atletët kosovarë për shkak të punëve që zgjatën një vit e gjysmë humbën komplet garat e stinorit të shkuar, e keq kanë nisur edhe këtë vit.

Në FAK kanë dyshime se edhe mitingu i dytë i hapur që është paraparë të mbahet më 17 prill mund të dështojë.