Asociacioni, dialogu me Serbinë e deklarata e Lajçakut që nxiti reagime – gjithçka nga intervista me deputeten e pozitës

Çështja e Asociacionit, dialogu me Serbinë, qasja e ndërmjetësit të Bashkimit Evropian, Miroslav Lajçak e zhvillime tjera ishin temë diskutimi me deputeten e lëvizjes Vetëvendosje, Arbëreshë Kryeziu-Hyseni.

Deputetja e LVV në një intervistë në emisionin “Përballje” në Telegrafi.com me kryeredaktorin Muhamet Hajrullahu tha se Asociacioni me kompetenca ekzekutive është hequr nga tavolina.

Ajo tha se tha se janë në pritje për ta dorëzuar një model alternativ si Qeveri e Kosovës për themelimin e Asociacionit të komunave me shumicë serbe, ndërsa shtoi se pala serbe është ajo së cilës nuk po i konvenon që të ketë marrëveshje në kuadër të Asociacionit.

“Serbisë nuk po i konvenon të ketë marrëveshje në kuadër të Asociacionit dhe kjo është arsyeja pse po e shkel krejt marrëveshjen e darkodimit që është arritur në kuadër të këtij procesi. Tash jemi duke pritur ta dorëzojmë një model alternativ si Qeveri e Kosovës dhe vetë kryeministri disa herë ka deklaruar se është i gatshëm ta përgatis këtë model.

Kryeministri ka qenë shumë kreativ në proces të dialogut pasi çdo herë në tavolinë ka pasur modele alternative që i ka ofruar në mënyrë që dialogimi të ketë shtrirje më të mirë”, tha Kryeziu-Hyseni.

Deputetja e LVV-së tutje deklaroi se partia e saj në vazhdimësi është munduar që ta bëjë të qartë se “themelimi i Asociacionit nuk është tema më e rëndësishme për të cilën duhet të shpenzohet gjithë kjo kohë dhe gjithë kjo energji”.

“Sa i përket dialogut, LVV e ka shprehur në vazhdimësi qëndrimin e saj, njëjtë si Qeveria dhe mazhoranca në Kuvend. LVV është mjaft e qartë në atë se çfarë presim dhe çfarë kërkojmë nga ky proces. Jemi munduar në vazhdimësi që të bëjmë të kuptojmë se Asociacioni nuk është tema më e rëndësishme për të cilën duhet të shpenzohet gjithë kjo kohë dhe gjithë kjo energji”.

Lexo po ashtu "Ka ose normalizim, ose konflikt", deputetja e LVV-së me kritika për deklaratën e Lajçakut: Këtë ta thotë në Beograd

E pyetur për të komentuar kritikat e opozitës se LVV-ja ka ndryshuar qëndrimet me ardhjen në pushtet, Kryeziu-Hyseni tha se partia e saj vazhdon të jetë kundër Asociacionit dhe se e kanë hequr nga tavolina e diskutimeve Asociacionin me kompetenca ekzekutive e madje edhe termin Asociacion.

Sa i përket draft-statutit të prezantuar nga ekipi menaxhues në takimin e Brukselit, deputetja e mazhorancës tha se më shumë ka qenë procedurë protokollare.

E deputetja nga radhët e LVV-së ka folur edhe për deklaratën e Lajçakut se “mes Kosovës dhe Serbisë mund të ketë normalizim ose konflikt, Bashkimi Evropian po punon për të parën”.

Kjo është deklarata që përfaqësuesi i Bashkimit Evropian për dialogun Kosovë-Serbi, Miroslav Lajçak, dha javën e kaluar në Prishtinë, pasi takoi kryeministrin Albin Kurti dhe zëvendëskryeministrin Besnik Bislimi.

Një deklaratë e tillë për deputeten e pozitës Lajçak duhet ta bënte në Beograd e jo në Prishtinë.

Të mërkurën e ftuar në emisionin “Përballje” në Telegrafi, deputetja e mazhorancës deklaroi se është pala serbe ajo e cila po e bllokon procesin e dialogut dhe ka tendencë për ta çuar situatën drejt konfliktit.

“Kam kritika ndaj qasjes së Lajçakut me Kosovën sepse nëse ai kërkon ose konflikt ose normalizim me deklaratën e tij këtë duhet ta potencoj në Serbi e jo në Kosovë. Nëse është një palë që po e bllokon procesin dhe ka tendencë për ta çuar situatën drejt konfliktit është Serbia”, tha Kryeziu-Hyseni në intervistën me kryeredaktorin Muhamet Hajrullahu.

“Fakti që ne kemi treguar gatishmëri për ta pranuar propozimin franko-gjerman, t’i dorëzojmë komentet tona e të kërkojmë që ato komente të integrohen në kuadër të marrëveshjes, e kemi bërë këtë dhe e kemi pranuar marrëveshjen, kemi qenë të gatshëm për ta nënshkruar dhe jemi të gatshëm të ulemi e të diskutojmë për secilën pikë dhe t’i implementojmë aq sa neve na bie që ta zbatojmë këtë marrëveshje. Të njëjtën gjë nuk e po bën pala serbe. Kjo kritikën duhet të shkojë në Serbi pasi ajo në vazhdimësi po e shkel marrëveshjen dhe nuk po tregon gatishmëri për ta zbatuar asnjë pikë të asaj marrëveshje”.

Sipas saj, BE-ja nuk mund të vendosë bllokada për Kosovën tani sepse nuk është duke shkaktuar telashe në proces.

“Shihet mjaft qartë kush po e pamundëson dialogimin mes palëve dhe kush po kërkon që të dialogohet vetëm për një çështje që është në interes të tyre. Si për Kosovën ashtu edhe për Serbinë ka shumë çështje më të rëndësishme të cilat mund të vihen në rend të diskutimit, nuk është Asociacioni e vetmja temë e rëndësishme”, u shpreh tutje deputetja. /Telegrafi/