Arsenali në ofensivë për të nënshkruar me Dominik Szoboszlai

Dominik Szoboszlai po konsiderohet si njëri nga futbollistët më të talentuar në Evropë.

Mesfushori hungarez prej dy vitesh është pjesë e RB Salzburg ku luan rregullisht dhe është lojtari kryesor i tyre.

Ai tanimë ndiqet nga skuadrat më të mëdha evropiane, përfshirë Milanin, Atletico Madrid, Tottenham Hotspur, RB Leipzig, Arsenal, Borussia Dortmund e Paris Saint Germain.

Por duket se Arsenali është një hap para ekipeve tjera për të nënshkruar me mesfushorin e talentuar hungarez.

Sipas asaj që kanë raportuar mediat angleze, Arsenali tanimë është në bisedime të avancuara me Salzburgun dhe agjentin e lojtarit.

Topçinjtë janë në ofensivë të plotë për të nënshkruar me lojtarin në janar dhe tanimë bëhet e ditur edhe oferta që i kanë bërë kampionëve në fuqi të Austrisë.

Skuadra londineze është gati të shpenzojë 29 milionë euro për transferimin e lojtarit në Londër.

Do të jetë një fitim i mirë për klubin austriak, pasi ata kishin shpenzuar vetëm 500 mijë euro për transferimin e tij nga Videoton.

Szoboszlai që luan në rolin e mesfushorit anësorë dhe organizativ, këtë edicion ka zhvilluar 12 ndeshje ku ka shënuar pesë gola e ka bërë tetë asistime.

Gjithnjë sipas medieve angleze, lojtari i ka dhënë një ‘po’ Arsenalit dhe tanimë pritet vetëm marrëveshja finale mes klubeve. /Telegrafi/