Arrestohet shoferi i kamionit që dyshohet se shkaktoi aksidentin në Klinë, ku vdiq një 35-vjeçar

Është arrestuar shoferi i kamionit i cili dyshohet se ka shkaktuar aksidentin me fatalitet, që ka ndodhur mesditën e së hënës në magjistralen Klinë- Gurakoc, në fshatin Krushevë e Vogël.

Në raportin 24 orësh të policisë bëhet e ditur se i njëjti është dërguar në mbajtje.

Ndërsa, viktimë e këtij aksidenti është një 35-vjeçar i cili sipas policisë, është dërguar në Institutin e Mjekësisë Ligjore për obduksion.

Lexo po ashtu Një 35-vjeçar humb jetën në një aksident trafiku në fshatin Krushevë të Klinës

“Klinë / 15.01.2024 – 12:55. Ka ndodhur aksident trafiku në mes një veture dhe një kamioni. Si pasojë, lëndime vdekjeprurëse ka pësuar vozitësi i veturës. Me vendim të prokurorit trupi i pa jetë i viktimës është dërguar në IML për obduksion, ndërsa vozitësi i kamionin mashkull është arrestuar dhe dërguar në mbajtje”, thuhet në raport.

Aksidentin të hënën e ka konfirmuar për Telegrafin zëdhënësi i Policisë së Kosovës për rajonin e Pejës, Fadil Gashi.

Ai ka thënë se në aksident janë përfshirë një veturë dhe një kamion.

“Rreth orës 12:52, ka ndodhur një aksident në magjistralen Klinë- Gurakoc, në fshatin Krushevë e Vogël. Në aksident kanë qenë të përfshira dy automjete, një veturë dhe një kamion. Për vozitësin e automjetit, mjeku kujdestar e ka konfirmuar vdekjen, ndërsa vozitësi i kamionit ka pësuar lëndime”, ka deklaruar Gashi./Telegrafi/