Armatimi i konfiskuar në veri, njohësit e sigurisë tregojnë se kush mund të ishte cak i sulmeve

Armatimi i konfiskuar të premten mbrëma ka pasur për qëllim sulmin ndaj institucioneve të Kosovës dhe atyre ndërkombëtare të sigurisë që operojnë në veri, thonë njohësit e sigurisë në vend.

Në veturën me targa të Beogradit që u kap në Zveçan janë gjetur dhe sekuestruar granata dore, fishekë të kalibrave të ndryshëm, koktej molotovi, jelekë anti-plumb dhe jelekë taktikë, uniforma ushtarake e shumë armë e pajisje të tjera ushtarake.

E ish-drejtori i Policisë së Kosovës, Rashit Qalaj, teksa e përgëzoi institucionin që drejtonte dikur për aksionin e zhvilluar, tha se është goditje e madhe ndaj forcave kriminale që operojnë në komunat veriore.

Ai në një prononcim për Telegrafin deklaroi se grupet kriminale në veri tash e një kohë janë bërë më të fuqishme si dhe janë duke përdorur armë të ndryshme për t’i rezistuar forcave të rendit.

“E përgëzoj Policinë e Kosovës për këtë operacion të suksesshëm dhe besoj se është goditje shumë e madhe ndaj forcave kriminale serbe, të cilat operojnë në komunat veriore. Këto armë që janë gjetur jam i bindur se kanë pasur qëllim sulmin ndaj institucioneve të Kosovës dhe institucioneve ndërkombëtare të sigurisë që operojnë në veri. Tash e një kohë strukturat kriminale në veri janë forcuar dhe janë duke përdorur armë të ndryshme për t’i rezistuar forcave të rendit, në këtë rast Policisë së Kosovës”, u shpreh Qalaj.

Sipas tij, cak i atij sulmi të planifikuar ishin veturat e blinduara të njësive speciale të Policisë së Kosovës e ndoshta edhe objektet në pikat kufitare.

“Por, nuk përjashtohet mundësia edhe për sulme ndaj institucioneve ndërkombëtare, EULEX-it dhe KFOR-it”.

Ish-drejtori i policisë tutje tha se beson që armatime të ngjashme janë futur edhe më parë në Kosovë përmes rrugëve ilegale.

“Besoj se strukturat kriminale të Serbisë kanë vetëm një qëllim: destabilizimin e situatës në veri dhe futjen e frikës te qytetarët serbë dhe po ashtu të sulmojnë e lëndojnë policët e Kosovës”, theksoi ai.

Armët e konfiskuara të shtunën u prezantuan në një konferencë për media nga drejtori i Përgjithshëm i Policisë së Kosovës, Gazmend Hoxha dhe ministri i Punëve të Brendshme, Xhelal Sveçla.

E njohësi i sigurisë, Bedri Elezi, për Telegrafin tha se se kalibrat e armëve që u prezantuan nga Hoxha e Sveçla, përdoren për aktivitete të rrezikshme.

“Kalibrat që u prezantuan janë kalibra që përdoren për aktivitete të rrezikshme si luftërat. Armët që janë prezantuar dyshohet se janë armë që janë sjellë në mënyrë të organizuar dhe konsiderohen tepër të rrezikshme pasi kanë kalibra të lartë”, deklaroi ai.

Kryeministri Albin Kurti dhe ministri Sveçla teksa kanë folur për aksionin policor për konfiskimin e armëve, kanë thënë se është parandaluar sulm terrorist.

E lidhur me këtë, Elezi tha se duhet pasur kujdes të veçantë në kualifikimin e veprave.

“Duhet të kemi kujdes të veçantë në kualifikim e veprave sepse mund të ballafaqohemi në procese gjyqësore ku duhet të argumentojnë pretendimet tonë në të kundërtën faktori ndërkombëtar mund të marrë masa të cilat nuk i shërbejnë sigurisë dhe institucioneve në Kosovë”.

Ai shtoi se beson fuqishëm që armatime të tilla tash e një kohë të gjatë janë duke u futur në territorin e Kosovës, dhe “sigurisht janë shumë më shumë se sasia që është konfiskuar”.

“Në veri ka arsenal armësh që përdoren nga grupet kriminale në aktivitete të ndryshme kriminale. Ato janë futur në periudha në ndryshme dhe në vazhdimësi kanë qëndruar nëpër depot e grupeve kriminale në veri, që financohen e mbështeten nga Beogradi zyrtar”.

Sipas Elezit, municioni që është konfiskuar është provë e mjaftueshme për të diskutuar me strukturat ndërkombëtare të sigurisë për të bashkërenduar për zgjerimin e aksionit në vende ku dyshohet se mund të ketë armë të tilla.

Kryeministri Kurti ka publikuar pamje të armatimit e pajisjeve ushtarake të cilat janë sekuestruar, ndërsa ka thënë se Serbia qartazi është e pozicionuar për përshkallëzim të situatës në veri të vendit.

“Sasia e madhe e armatimit të gjetur tregon për përmasat e aksionit të planifikuar e të pasojave të parandaluara. Serbia qartazi është e pozicionuar për përshkallëzim të situatës”, ka shkruar kreu i ekzekutivit në Facebook. /Telegrafi/