Apeli i Romës vendos sërish: 43 emigrantët në Gjadër të kthehen në Itali

Për herë të tretë Gjykata e Apelit në Romë ka vendosur që emigrantët ilegalë të dërguar në qendrat e pritjes në Gjadër e Shëngjin, të kthehen në Itali.

Vendimi, i cili detyron dërgimin në Itali të 43 emigrantëve që ndodhet aktualisht në Lezhë, u mor gjatë mbrëmjes së premtes (31 janar 2025). Kështu, të gjithë 43 emigrantët që u sollën në Shqipëri ditën e hënë, do të kthehen nesër, datë 1 shkurt 2025 në Itali.

Gjyqtarët që ishin ngarkuar me shqyrtimin e dosjeve të çdo emigranti kanë vendosur të shprehin mendim negativ ndaj rikthimit, siç parashikohet në procedurën e miratuar nga qeveria.

Gjykimi, lexohet në dispozitën e firmosur nga gjyqtarët, duhet të pezullohet në pritje të vendimit të Gjykatës së Drejtësisë. Duke qenë se pezullimi e bën të pamundur respektimin e afatit 48 orësh për vlefshmëri, detyrimisht duhet të urdhërohet lirimi i të arrestuarve, siç e ka pohuar vazhdimisht Gjykata Kushtetuese në raste të ngjashme’, shkruan La Repubblica.

Të gjitha këto ndodhin në pritje të një vendimi të Gjykatës Evropiane që do të shprehet përfundimisht në lidhje me çështjen e vendeve të sigurta më 25 shkurt.

Ndërkohë, vendimi i fundit i Kasacionit kishte caktuar qeverinë si organin kompetent për të vendosur mbi këtë çështje, duke lënë gjithashtu mundësinë që gjykatësit të vendosin rast pas rasti se çfarë është e drejtë. /EuronewsAlbania/